Tesla kompaniyasi asoschisi Ilon Mask Avstraliya rasmiylaridan dunyodagi eng yirik litiy-ion batareyalari qurilishi uchun ruxsat olganini bildirdi. Bu haqda, International Business Times nashriga tayanib, “Interfaks” xabar bermoqda.
Yirik batareya omborxonasi Janubiy Avstraliya shtatida qurilishi rejalashtirilmoqda.
Mahalliy aholi 2016-yil sentabrida 50 yildan buyon eng yirik dovul qayd etilganidan buyon elektr energiyasidan jiddiy qiynalmoqda. Shtat poytaxti Adelaidada o‘shanda shamol tezligi soatiga 90 kilometrni tashkil qilgan, to‘lqinlar 10 metrdan ziyodga ko‘tarilgan edi. Tabiiy ofat infrastrukturalarni zararlab, 1,7 million kishini elektr quvvatisiz qoldirgan edi.
Loyiha qayta tiklanuvchi energiya manbalari ishlab chiqaruvchi Neoen kompaniyasi bilan hamkorlikda amalga oshiriladi. Elektr quvvatini saqlash stansiyasi Jeymstaun shahridagi shamol tegirmoniga ulanadi. Batareyalar tizimining umumiy quvvati 100 MVt ni, sig‘imi 129 MVt/soatni tashkil etadi. Bu 30 ming uyni yoritish uchun yetarli bo‘ladi.
“Agar Janubiy Avstraliya katta tavakkalga borishga tayyor bo‘lsa, biz0 ham bunga tayyormiz”, — dedi Mask Adelaidada o‘tgan tender yakunlari e’lonida.
Izoh (0)