O‘zbekiston tashqi ishlar vazirining 5-iyulda o‘tkazgan to‘g‘ridan-to‘g‘ri muloqotiga “O‘zbekiston onalari nomidan” deb imzo qo‘yilgan murojaat kelib tushgan.
Ko‘pchilik tomonidan yuborilgan murojaatda yaqinda matbuotda Qozog‘iston va Qirg‘ziston harbiylarning Suriyada olib borilayogan harbiy harakatlarga jalb qilinishi haqidagi xabarlarga xavotir bildirilgan holda, O‘zbekiston harbiy kontingenti chet eldagi tinchlikparvar missiyalarga yuborilishi mumkin yoki yo‘qligi so‘ralgan.
Savolga javob qaytarar ekan, Abdulaziz Komilov O‘zbekiston chet eldagi harbiy harakatlarda ishtirok etmasligini qat’iy ta’kidladi.
“Prezidentimiz Shavkat Mirziyoyev o‘zining dastlabki ma’ruzasida ochiq-oydin aytganidek, O‘zbekiston hech qachon hech qanday harbiy blokka a’zo bo‘lmaydi, xorijdagi hech qanday tinchlikparvar kuchlarga o‘z yigitlarini, askarlarini yubormaydi, shuningdek, mamlakat hududiga hech qanday harbiy blok va bazalarning kirishiga rozilik bermaydi”, — deya O‘zbekistonning dunyodagi harbiy harakatlarga munosabatini ifoda etdi TIV rahbari.
O‘zbekistonning tashqi siyosatdagi prinsiplarini qayd etib o‘tgan vazir o‘zbekistonlik onalarning xavotiriga o‘rin yo‘q ekanligini ta’kidladi. Shuningdek, qo‘shni mamlakatlar bilan aloqalarning tobora mustahkamlanib borayotganini qo‘shimcha qildi.
Izoh (0)