Prezident devonining Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati Yangiqo‘rg‘on tumani hokimligida navbatdagi sayyor qabulni o‘tkazdi. Bu haqda “Daryo”ga tuman hokimligi axborot xizmati ma’lum qildi.
Respublika huquq-tartibot idoralari, davlat va jamoat tashkilotlari vakillari ishtirok etgan sayyor qabulda Namangan viloyatining To‘raqo‘rg‘on, Chortoq va Yangiqo‘rg‘on tumanlaridan Xalq qabulxonalariga murojaat yo‘llagan 40 dan ortiq fuqaroning shikoyat va takliflari tinglandi.
— Yangiqo‘rg‘on tumanidan murojaat qilgan 10 dan oshiq fuqaroning masalasi o‘z yechimini topdi. Jumladan, Nurxon Mavlonovaning turmush o‘rtog‘ini nogironlik guruhiga o‘tkazish, O‘g‘iloy Umarovaning elektr tarmog‘i ustunini almashtirish, Fayzulla To‘lanboyevning tadbirkorlik uchun bo‘sh binodan foydalanish borasidagi murojaatlari hal etildi. Dilobar Hamidova, Doniyor G‘ulomov, Mastura Jo‘raqulova ish bilan ta’minlandi, — deydi tuman hokimligi tashkiliy-nazorat guruhi rahbari vazifasini bajaruvchi Fayzullo Samadov.
Tumanning “Gaznon” mahallasida yashovchi Mohira Imomboyevaning ham ko‘p yillik orzusi ushaldi. 1-guruh nogironi, uy-joyi bo‘lmagan ayolga 2 xonali xonadonning dastlabki badali to‘lab berildi va tikuv mashinasi hadya etildi.
Izoh (0)