Президент девонининг Фуқаролар ҳуқуқларини ҳимоя қилиш, жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати Янгиқўрғон тумани ҳокимлигида навбатдаги сайёр қабулни ўтказди. Бу ҳақда «Дарё»га туман ҳокимлиги ахборот хизмати маълум қилди.
Республика ҳуқуқ-тартибот идоралари, давлат ва жамоат ташкилотлари вакиллари иштирок этган сайёр қабулда Наманган вилоятининг Тўрақўрғон, Чортоқ ва Янгиқўрғон туманларидан Халқ қабулхоналарига мурожаат йўллаган 40 дан ортиқ фуқаронинг шикоят ва таклифлари тингланди.
— Янгиқўрғон туманидан мурожаат қилган 10 дан ошиқ фуқаронинг масаласи ўз ечимини топди. Жумладан, Нурхон Мавлонованинг турмуш ўртоғини ногиронлик гуруҳига ўтказиш, Ўғилой Умарованинг электр тармоғи устунини алмаштириш, Файзулла Тўланбоевнинг тадбиркорлик учун бўш бинодан фойдаланиш борасидаги мурожаатлари ҳал этилди. Дилобар Ҳамидова, Дониёр Ғуломов, Мастура Жўрақулова иш билан таъминланди, — дейди туман ҳокимлиги ташкилий-назорат гуруҳи раҳбари вазифасини бажарувчи Файзулло Самадов.
Туманнинг «Газнон» маҳалласида яшовчи Моҳира Имомбоеванинг ҳам кўп йиллик орзуси ушалди. 1-гуруҳ ногирони, уй-жойи бўлмаган аёлга 2 хонали хонадоннинг дастлабки бадали тўлаб берилди ва тикув машинаси ҳадя этилди.
Изоҳ (0)