O‘zbekiston Prezidenti Shavkat Mirziyoyev 30-iyun kuni “Respublikada axborot texnologiyalari sohasini rivojlantirish uchun shart-sharoitlarni tubdan yaxshilash chora-tadbirlari to‘g‘risida”gi farmonni imzoladi. Hujjat matni O‘zAda keltirildi.
Hujjatda keltirilgan bandlarda Mirzo Ulugbek Innovation Center innovatsiya markazi tashkil etilishi ko‘zda tutilgan.
Innovatsiya markazi axborot texnologiyalari mahsulotlarini ishlab chiqarishni rivojlantirish uchun eng qulay sharoitlarni yaratish maqsadida butun respublika hududida Innovatsiya markazi rezidentlarini joylashtirgan holda O‘zbekiston Respublikasi hududi doirasida eksterritoriallik prinsipi asosida tashkil qilinadi.
Innovatsiya markazi faoliyatining asosiy yo‘nalishlari etib quyidagilar belgilandi:
xo‘jalik yurituvchi subyektlar va oliy ta’lim muassasalarining axborot texnologiyalari mahsulotlarini ishlab chiqarish hamda ichki va tashqi bozorlarda sotishga qaratilgan o‘zaro hamkorligini kengaytirish uchun zarur tashkiliy-texnik va moliyaviy-iqtisodiy shart-sharoitlar yaratish;
AKT sohasida raqobatdosh loyihalarni ichki va tashqi bozorlarda sotish uchun xorijiy investitsiyalarni jalb etishda Innovatsiya markazi rezidentlariga ko‘maklashish;
oliy ta’lim muassasalari va kasb-hunar kollejlarining “axborot texnologiyalari” mutaxassisligi bo‘yicha bitiruvchilarining ishga joylashtirilishini ta’minlashda, shu jumladan, iqtidorli yoshlar tomonidan startap loyihalarini amalga oshirishda ularni qo‘llab-quvvatlash yo‘li bilan ishtirok etish;
qisqa muddatli va o‘rta muddatli ixtisoslashtirilgan kurslarni tashkil etish, shu jumladan, chet el mutaxassislarini taklif etish yo‘li bilan AKT sohasidagi kadrlar malakasini oshirish va ularni qayta tayyorlashni tashkil qilish;
yosh tadbirkorlar tomonidan axborot texnologiyalari mahsulotlarini ishlab chiqarish sohasidagi istiqbolli yo‘nalishlar bo‘yicha innovatsiya loyihalari amalga oshirilishini qo‘llab-quvvatlash.
Hujjatga ko‘ra, Innovatsiya markazi rezidentlari 2028-yil 1-yanvargacha bo‘lgan muddatga:
barcha turdagi soliqlar va davlat maqsadli jamg‘armalariga majburiy ajratmalarni, shuningdek, yagona ijtimoiy to‘lovni to‘lashdan;
belgilangan tartibda tasdiqlanadigan ro‘yxatlar bo‘yicha O‘zbekiston Respublikasida ishlab chiqarilmaydigan, o‘z ehtiyojlari uchun olib kirilayotgan uskunalar, butlovchi qismlar, detallar, uzellar, texnologik hujjatlar, dasturiy ta’minot vositalari uchun bojxona to‘lovlari to‘lashdan (bojxona yig‘imlaridan tashqari);
o‘zi ishlab chiqaradigan tovarlarni (ishlar, xizmatlar) eksport qilishdan tushadigan valyuta tushumining bir qismini majburiy sotishdan ozod etiladi.
O‘rnatilgan tartibga muvofiq Innovatsiya markazi rezidentlari:
o‘zi ishlab chiqargan tovarlarni (ishlar, xizmatlar) eksport qilishdan tushgan pul mablag‘lari doirasida xodimlarga ish haqi va dividendlarni xalqaro to‘lov kartalariga o‘tkazish yo‘li bilan naqd bo‘lmagan shaklda O‘zbekiston Respublikasi hududida hisob-kitoblarni chet el valyutasida amalga oshirish;
eksport kontrakti mavjud bo‘lmagan holda internetdagi onlayn do‘konlar orqali ishlar va xizmatlar eksportini chet el valyutasida amalga oshirish huquqiga ega bo‘ladi.
Izoh (0)