1-iyuldan boshlab Buxoro – Samarqand – Toshkent yo‘nalishi bo‘ylab yuqori tezlikda harakatlanuvchi “Afrosiyob” yo‘lovchi elektropoyezdi qatnovi yo‘lga qo‘yiladi. Bu haqda “O‘zbekiston temir yo‘llari” AJ axborot xizmatiga tayanib, UZ24 ma’lum qildi.
№766/765-sonli poyezd har kuni ertalabki soat 5:00 da Buxoro vokzalidan jo‘nab, ertalabki soat 8:48 da Toshkent markaziy vokzaliga kirib keladi. Shu kuni kechki soat 18:50 da ortga qaytgan poyezd tungi soat 22:48 da Buxoroga yetib boradi.
Shu munosabat bilan 1-iyuldan Toshkent – Qarshi – Toshkent hamda Toshkent – Buxoro – Toshkent yo‘nalishlarida harakatlanayotgan “Afrosiyob” poyezdlarining harakatlanish vaqtiga ham o‘zgartirish kiritildi.
Toshkent – Qarshi – Toshkent yo‘nalishida harakatlanadigan №760/759-sonli “Afrosiyob” har kuni ertalabki soat 8:00 da Toshkent markaziy vokzalidan jo‘nab, kunduzgi soat 11:20 da Qarshiga yetib boradi va shu kunning o‘zida kunduzgi soat 16:48 da Qarshi vokzalidan ortga qaytib, kechki soat 20:10 da Toshkentga yetib keladi.
Toshkent – Buxoro – Toshkent yo‘nalishida harakatlanadigan №762/761-sonli elektropoyezd har kuni ertalabki soat 7:30 da poytaxtdan jo‘nab, kunduzgi soat 11:16 da Buxoroga yetib boradi va shu kuni kunduzgi soat 15:52 da Buxorodan ortga qaytib, kechki soat 19:40 da Toshkentga yetib keladi.
Shuningdek, 1-iyul kunidan boshlab bir qator yo‘lovchi poyezdlarning harakatlanish jadvaliga ham o‘zgartirishlar kiritildi. Bu boradagi ma’lumotlarni “www.railway.uz” veb-sayti yoki 1005 telefon raqami orqali bilib olishingiz mumkin, deyiladi “O‘zbekiston temir yo‘llari” xabarida.
Izoh (0)