9-iyun kuni Qozog‘istonning Ostona shahrida ochilgan EXPO – 2017 xalqaro ixtisoslashtirilgan ko‘rgazmasida O‘zbekiston pavilyoni eng ko‘p tashrif buyurilgan pavilyonlar ro‘yxatida 2-o‘rinni egalladi. Bu haqda, ko‘rgazma saytiga asoslanib, Uz24 yozmoqda.
1-o‘rinini Rossiya, 3-o‘rinini Hindiston zabt etdi. Kuchli o‘nlikda, shuningdek, Ozarbayjon, Afrika, Misr, Xitoy, Turkiya, BAA va Malayziya bor.
Sayt ma’lumotlariga ko‘ra, ko‘rgazma ochilgandan buyon unga 425 ming kishi tashrif buyurdi. Unda O‘zbekiston, Rossiya, AQSh, Xitoy, Germaniya, Buyuk Britaniya, Fransiya, Yaponiya, Janubiy Koreya, Turkiya, Hindiston, Vyetnam, Armaniston, Pokiston, Ozarbayjon, Belarus, Kuba, Turkmaniston, Ruminiya, Braziliya singari 120 dan ortiq davlat o‘zining texnologik, ilmiy, madaniy yutuqlarini namoyish etmoqda.
O‘zbekiston uchun ikki qavatli pavilyon ajratilgan. Uning birinchi qavati 630 kvadrat metr maydonni egallagan. Bu yerda quyosh, shamol va suv, ya’ni kelajak energiyasi mahsulotlari namoyish etilmoqda. Quyosh energiyasi stendi 2030-yilda avtomobillarni quyosh nuri yordamida qanday quvvatlantirish mumkin ekani amalda namoyish etilmoqda.
Umumiy maydoni 550 kvadrat metrni tashkil etgan ikkinchi qavatda mamlakatning transport va logistika, turizm sohalari hamda oziq-ovqat, vino va sharbat tayyorlash sanoatida erishilgan yutuqlar, milliy taomlar namoyish etilmoqda.
Ko‘rgazma sentabrga qadar davom etadi.