9 июнь куни Қозоғистоннинг Остона шаҳрида очилган EXPO – 2017 халқаро ихтисослаштирилган кўргазмасида Ўзбекистон павильони энг кўп ташриф буюрилган павильонлар рўйхатида 2-ўринни эгаллади. Бу ҳақда, кўргазма сайтига асосланиб, Uz24 ёзмоқда.
1-ўринини Россия, 3-ўринини Ҳиндистон забт этди. Кучли ўнликда, шунингдек, Озарбайжон, Африка, Миср, Хитой, Туркия, БАА ва Малайзия бор.
Сайт маълумотларига кўра, кўргазма очилгандан буён унга 425 минг киши ташриф буюрди. Унда Ўзбекистон, Россия, АҚШ, Хитой, Германия, Буюк Британия, Франция, Япония, Жанубий Корея, Туркия, Ҳиндистон, Вьетнам, Арманистон, Покистон, Озарбайжон, Беларусь, Куба, Туркманистон, Руминия, Бразилия сингари 120 дан ортиқ давлат ўзининг технологик, илмий, маданий ютуқларини намойиш этмоқда.
Ўзбекистон учун икки қаватли павильон ажратилган. Унинг биринчи қавати 630 квадрат метр майдонни эгаллаган. Бу ерда қуёш, шамол ва сув, яъни келажак энергияси маҳсулотлари намойиш этилмоқда. Қуёш энергияси стенди 2030 йилда автомобилларни қуёш нури ёрдамида қандай қувватлантириш мумкин экани амалда намойиш этилмоқда.
Умумий майдони 550 квадрат метрни ташкил этган иккинчи қаватда мамлакатнинг транспорт ва логистика, туризм соҳалари ҳамда озиқ-овқат, вино ва шарбат тайёрлаш саноатида эришилган ютуқлар, миллий таомлар намойиш этилмоқда.
Кўргазма сентябрга қадар давом этади.
Изоҳ (0)