2017-yil 27-iyunda O‘zbekiston tashqi ishlar vaziri Abdulaziz Komilov O‘zbekistonga rasmiy tashrif bilan kelgan Vengriyaning tashqi iqtisodiy aloqalar va tashqi ishlar vaziri Peter Siyyarto bilan uchrashdi. Bu haqda Tashqi ishlar vazirligining axborot xizmati ma’lum qildi.
2016-yilning oktabr va dekabr oyida Brussel va Gamburg shaharlarida bo‘lib o‘tgan ikki tomonlama uchrashuvning davomi sifatida tashqi siyosat idoralari rahbarlari O‘zbekiston—Vengriya munosabatlarining siyosiy, savdo-iqtisodiy, investitsion, madaniy-gumanitar va boshqa sohalardagi dolzarb masalalarini muhokama qildi.
Davlatlararo hamkorlikni yanada kengaytirish, biznes hamjamiyati, ilmiy doiralar, ta’lim muassasalari vakillari, madaniyat va san’at faollari o‘rtasida aloqalarni mustahkamlashdan ikki tomon ham manfaatdor ekanligi ta’kidlandi.
Uchrashuvda moliya, qishloq va suv xo‘jaligi, qishloq xo‘jaligi mahsulotlarini qayta ishlash va ta’lim sohalarida istiqbolli qo‘shma loyihalar amaliy jihatdan muhokama qilindi. Xususan, Vengriya tomoni o‘zbekistonlik talabalar ta’lim olishlari uchun yiliga 30 ta stipendiya ajratishni rejalashtirmoqda.
Uchrashuv chog‘ida Vengriyaning Toshkent shahridagi elchixonasining rasmiy ochilish marosimi ikki tomonlama aloqalarni tizimli asosda mustahkamlash va ko‘p qirrali tus berishga imkon yaratishi ta’kidlandi.
Muzokaralar yakunlanganidan so‘ng O‘zbekiston Sog‘liqni saqlash vazirligi bilan Vengriya Inson resurslari vazirligi o‘rtasida 2017—2020-yillarga mo‘ljallangan sog‘liqni saqlash sohasida hamkorlik to‘g‘risidagi bitim vazirlar tomonidan imzolandi.
Izoh (0)