2017 йил 27 июнда Ўзбекистон ташқи ишлар вазири Абдулазиз Комилов Ўзбекистонга расмий ташриф билан келган Венгриянинг ташқи иқтисодий алоқалар ва ташқи ишлар вазири Петер Сийярто билан учрашди. Бу ҳақда Ташқи ишлар вазирлигининг ахборот хизмати маълум қилди.
2016 йилнинг октябрь ва декабрь ойида Бруссел ва Гамбург шаҳарларида бўлиб ўтган икки томонлама учрашувнинг давоми сифатида ташқи сиёсат идоралари раҳбарлари Ўзбекистон—Венгрия муносабатларининг сиёсий, савдо-иқтисодий, инвестицион, маданий-гуманитар ва бошқа соҳалардаги долзарб масалаларини муҳокама қилди.
Давлатлараро ҳамкорликни янада кенгайтириш, бизнес ҳамжамияти, илмий доиралар, таълим муассасалари вакиллари, маданият ва санъат фаоллари ўртасида алоқаларни мустаҳкамлашдан икки томон ҳам манфаатдор эканлиги таъкидланди.
Учрашувда молия, қишлоқ ва сув хўжалиги, қишлоқ хўжалиги маҳсулотларини қайта ишлаш ва таълим соҳаларида истиқболли қўшма лойиҳалар амалий жиҳатдан муҳокама қилинди. Хусусан, Венгрия томони ўзбекистонлик талабалар таълим олишлари учун йилига 30 та стипендия ажратишни режалаштирмоқда.
Учрашув чоғида Венгриянинг Тошкент шаҳридаги элчихонасининг расмий очилиш маросими икки томонлама алоқаларни тизимли асосда мустаҳкамлаш ва кўп қиррали тус беришга имкон яратиши таъкидланди.
Музокаралар якунланганидан сўнг Ўзбекистон Соғлиқни сақлаш вазирлиги билан Венгрия Инсон ресурслари вазирлиги ўртасида 2017—2020 йилларга мўлжалланган соғлиқни сақлаш соҳасида ҳамкорлик тўғрисидаги битим вазирлар томонидан имзоланди.
Изоҳ (0)