Qatar arab davlatlarining sanksiyalarni bekor qilish uchun qo‘ygan talablarini nomaqubul va amalga oshirib bo‘lmas deya atadi. Bu haqda “Interfaks” xabar berdi.
“Talablar ro‘yxati Qatar avval boshdan aytib kelayotgan gaplarni tasdiqladi. Noqonuniy qamalning terrorchilikka qarshi kurashga hech qanday aloqasi yo‘q, u Qatar suverenitetini cheklash va bizning tashqi siyosatimizga aralashish bilan bog‘liq”, — dedi Qatar hukumati matbuot kotibi shayx Saif al-Tani.
Uning so‘zlariga ko‘ra, ayni vaqtda mamlakat hukumati arab davlatlari olg‘a surgan talablar ro‘yxatini o‘rganmoqda va javob tayyorlamoqda.
Avvalroq, Qatar inson huquqlari bo‘yicha milliy qo‘mitasi arab davlatlari tomonidan yuborilgan ro‘yxat inson huquqlarining himoyasi bo‘yicha xalqaro konvensiyaga zid ekanligini ma’lum qilgan hamda mamlakat hukumatini ushbu talablarni bajarishdan bosh tortishga chaqirgan.
23-iyun, juma kuni Saudiya Arabistoni, BAA, Misr va Bahrayn Kuvayt vakillari orqali Qatarga 13 ta talabdan iborat, jumladan, Eron bilan aloqalarni cheklashga bog‘liq ro‘yxatni yuborgan. Qatar hukumati, shuningdek, mamlakat hududidagi Turkiya harbiy bazasini yopishi va Al Jazeera telekanali faoliyatini to‘xtatishi kerak. Bundan tashqari, arab mamlakatlari Dohadan tovon puli to‘lashni talab qilmoqda, ammo uning aniq summasi noma’lum. Ular bu talablarni 10 kun ichida bajarish Doha bilan munosabatlarni normallashtirishning asosiy sharti deya atadi.
Loyihaga ko‘ra, Qatar Eron bilan faqatgina AQSh sanksiyalari va Tehronga qarshi xalqaro sanksiyalar ruxsat bergan savdo aloqalarini o‘rnatish huquqiga ega bo‘ladi.
Izoh (0)