Қатар араб давлатларининг санкцияларни бекор қилиш учун қўйган талабларини номақубул ва амалга ошириб бўлмас дея атади. Бу ҳақда «Интерфакс» хабар берди.
«Талаблар рўйхати Қатар аввал бошдан айтиб келаётган гапларни тасдиқлади. Ноқонуний қамалнинг террорчиликка қарши курашга ҳеч қандай алоқаси йўқ, у Қатар суверенитетини чеклаш ва бизнинг ташқи сиёсатимизга аралашиш билан боғлиқ», — деди Қатар ҳукумати матбуот котиби шайх Саиф ал-Тани.
Унинг сўзларига кўра, айни вақтда мамлакат ҳукумати араб давлатлари олға сурган талаблар рўйхатини ўрганмоқда ва жавоб тайёрламоқда.
Аввалроқ, Қатар инсон ҳуқуқлари бўйича миллий қўмитаси араб давлатлари томонидан юборилган рўйхат инсон ҳуқуқларининг ҳимояси бўйича халқаро конвенцияга зид эканлигини маълум қилган ҳамда мамлакат ҳукуматини ушбу талабларни бажаришдан бош тортишга чақирган.
23 июнь, жума куни Саудия Арабистони, БАА, Миср ва Баҳрайн Кувайт вакиллари орқали Қатарга 13 та талабдан иборат, жумладан, Эрон билан алоқаларни чеклашга боғлиқ рўйхатни юборган. Қатар ҳукумати, шунингдек, мамлакат ҳудудидаги Туркия ҳарбий базасини ёпиши ва Al Jazeera телеканали фаолиятини тўхтатиши керак. Бундан ташқари, араб мамлакатлари Доҳадан товон пули тўлашни талаб қилмоқда, аммо унинг аниқ суммаси номаълум. Улар бу талабларни 10 кун ичида бажариш Доҳа билан муносабатларни нормаллаштиришнинг асосий шарти дея атади.
Лойиҳага кўра, Қатар Эрон билан фақатгина АҚШ санкциялари ва Теҳронга қарши халқаро санкциялар рухсат берган савдо алоқаларини ўрнатиш ҳуқуқига эга бўлади.
Изоҳ (0)