Самарқанд вилояти перинатал марказида тиббий кислород ишлаб чиқариш генератори кичик заводи ҳамда эндогинекология ўқув маркази фойдаланишга топширилди. Бу ҳақда ЎзА хабар берди.
Соғлиқни сақлаш вазирлиги ва Германия халқаро ҳамкорлик ташкилоти томонидан Бельгиядан 90 минг еврога келтирилган тиббий кислород ишлаб чиқариш генератори Марказий Осиёда ягона мини корхона ҳисобланади. Генератор нафақат марказ, балки вилоятдаги бошқа туғруқ мажмуаларининг тиббий кислородга бўлган эҳтиёжини қондиради, ушбу мақсад учун сарфланадиган маблағ тежалишига имконият беради. Перинатал марказдаги беморларга бир йилда тиббий кислород учун ўртача 160 миллион сўм ажратилар эди.
Тиббиёт муассасасида Самарқанд давлат тиббиёт институтининг врачлар малакасини ошириш факультети базасида ташкил этилган эндогинекология ўқув маркази вилоят шифокорларининг эндовизуал гинекология соҳасидаги малакаларини оширишга хизмат қилади. Бу ерда айни пайтда Соғлиқни сақлаш вазирлиги, Германия халқаро ҳамкорлик ташкилотининг «Юқори технологик тиббий асбоб-ускуналардан фойдаланиш бўйича тиббий ва техник ходимлар малакасини ошириш» лойиҳаси ҳамда «Карл сторз», «Жонсон&Жонсон» каби халқаро ташкилотлар ҳамкорлигида «Оператив гинекологияда лапароскопия ва гистероскопия» мавзусида маҳорат дарслари ўтказилмоқда.
Изоҳ (0)