73 yoshli avstraliyalik Devid Glashin 1987-yilgi moliyaviy inqiroz chog‘ida deyarli butun davlatidan ayrilmagunicha muvaffaqiyatli biznesmen bo‘lgan, deb yozadi “Vesti.ru”. O‘shandan buyon Devid hayotining mag‘zini qaytadan chaqib, Yashil qit’a sohillari yaqinidagi kichik orolchada yolg‘iz yashashga qaror qildi, u yerda 20 yildan buyon yashab kelmoqda.
Glashinning so‘zlariga ko‘ra, yangi hayotni qidirish uchun u deyarli o‘n yil vaqtini sarflagan. Biznesmen kasodga uchragach, ko‘p o‘tmay, uni rafiqasi tashlab ketgan, yangi ma’shuqasi esa unga odam yashamaydigan birorta orolga birga qochib ketishni taklif qilgan. Devid rozi bo‘lgan, ammo tezda qiz yovvoyi tabiat qo‘ynida yashashga tayyor emasligi ma’lum bo‘lgan. Shu tariqa avstraliyalik yolg‘iz qolib ketgan. Hozir uning yagona suhbatdoshi — iti.
Sobiq millionerning taxtadan yasalgan kulbasida elektr toki deyarli yo‘q, u quyosh batareyalari orqali olinadi. Shunga qaramay, avstraliyalik tashqi olam bilan aloqani yo‘qotmagan va vaqti-vaqti bilan Internetga kirib turadi. U teleshoular ko‘radi va hatto ayollar bilan tanishadi.
Devid o‘zi polizda yetishtirgan mahsulotlar bilan oziqlanadi. Yiliga bir marta yaqindagi shaharga borib, o‘zini shirinliklar va mustaqil tayyorlash mumkin bo‘lmagan boshqa oziq-ovqatlar bilan siylaydi.
Ba’zan uning oroliga sayyohlar mehmonga borib turadi, ular o‘zlari bilan turli sovg‘alar olib boradi.
Avstraliyalik hayotidan mamnunligini va o‘zini jannatda yashayotgandek his qilishini aytadi.
Izoh (0)