Bosh ko‘chirib o‘tkazish operatsiyasi bilan bog‘liq shov-shuvdan to‘rt yil o‘tib, rossiyalik dasturchi operatsiya qilinmasligi ma’lum bo‘ldi. 2017-yil dekabrida Valeriy Spiridonovning boshini yangi tanaga ko‘chirib o‘tkazish rejalashtirilayotgan edi, bunga 15 million dollarga yaqin mablag‘ talab etiladi. “MK.ru” operatsiya bo‘lib o‘tmasligidan xabar topdi.
Shifokor Serjio Kanavero xitoylik bemor foydasiga rossiyalikdan voz kechdi. Taxminlarga ko‘ra, tajriba sifatida operatsiya qilinadigan odam to‘liq falaj holatdagi 62 yoshli Van Xuanmindir.
Spiridonov aytib berishicha, boshidanoq operatsiya uchun da’vogarlar bir necha kishi bo‘lgan. Italiyalik neyrojarroh turli mamlakatlar hukumatlariga ko‘mak so‘rab murojaat qilib ko‘rgan, ammo faqat Xitoy rozi bo‘lgan.
Rossiyalik dasturchi umurtqa pog‘onasini operatsiya qilishga mablag‘ yig‘ish uchun Rossiyadagi jamg‘armalardan biriga murojaat qildi.
“Xayriyat, mening kasalligimda umurtqa pog‘onasini menda hozir bo‘lganidek, egilgan holatda emas, balki to‘g‘ri holatda tutib turish uchun po‘lat sterjenni implantatsiya qilish bo‘yicha operatsiya o‘tkazish imkoniyati mavjud… Albatta, u mushaklar mustahkamligini qaytarmaydi va yurish imkoniyatini bermaydi, ammo hayot sifati keskin tarzda yaxshi tomonga o‘zgaradi”, — dedi Spiridonov.
Izoh (0)