73 ёшли австралиялик Дэвид Глашин 1987 йилги молиявий инқироз чоғида деярли бутун давлатидан айрилмагунича муваффақиятли бизнесмен бўлган, деб ёзади «Вести.ru». Ўшандан буён Дэвид ҳаётининг мағзини қайтадан чақиб, Яшил қитъа соҳиллари яқинидаги кичик оролчада ёлғиз яшашга қарор қилди, у ерда 20 йилдан буён яшаб келмоқда.
Глашиннинг сўзларига кўра, янги ҳаётни қидириш учун у деярли ўн йил вақтини сарфлаган. Бизнесмен касодга учрагач, кўп ўтмай, уни рафиқаси ташлаб кетган, янги маъшуқаси эса унга одам яшамайдиган бирорта оролга бирга қочиб кетишни таклиф қилган. Дэвид рози бўлган, аммо тезда қиз ёввойи табиат қўйнида яшашга тайёр эмаслиги маълум бўлган. Шу тариқа австралиялик ёлғиз қолиб кетган. Ҳозир унинг ягона суҳбатдоши — ити.
Собиқ миллионернинг тахтадан ясалган кулбасида электр токи деярли йўқ, у қуёш батареялари орқали олинади. Шунга қарамай, австралиялик ташқи олам билан алоқани йўқотмаган ва вақти-вақти билан Интернетга кириб туради. У телешоулар кўради ва ҳатто аёллар билан танишади.
Дэвид ўзи полизда етиштирган маҳсулотлар билан озиқланади. Йилига бир марта яқиндаги шаҳарга бориб, ўзини ширинликлар ва мустақил тайёрлаш мумкин бўлмаган бошқа озиқ-овқатлар билан сийлайди.
Баъзан унинг оролига сайёҳлар меҳмонга бориб туради, улар ўзлари билан турли совғалар олиб боради.
Австралиялик ҳаётидан мамнунлигини ва ўзини жаннатда яшаётгандек ҳис қилишини айтади.
Изоҳ (0)