“Qozog‘iston“ kinoteatri oldiga o‘rnatilganiga bir kun bo‘lgan metall to‘siqlar olib tashlandi

Toshkentdagi “Qozog‘iston” kinoteatri va Yunusobod tumani hokimiyati oralig‘ida joylashgan Amir Temur shoh ko‘chasidagi piyodalar yo‘lagiga o‘rnatilgan metall to‘siqlar bir kun o‘tib olib tashlandi. B haqda UZ24 xabar berdi.

Obodonlashtirish bosh boshqarmasining Yo‘l bo‘limi vakillarining UZ24 nashriga xabar qilishicha, poytaxt hokimligi tomonidan 21-iyun, chorshanba kuni ertalab ushbu o‘tish yo‘lagini ochish bo‘yicha topshiriq bo‘lgan va hududdagi metall hamda beton to‘siqlar olib tashlangan.

Mazkur holat bo‘yicha Toshkent hokimligi tahririyatga hech qanday izoh bermadi.

20-iyun, seshanba kuni ertalab piyodalar yo‘lagi metall to‘siqlar bilan yopib qo‘yilgandi. Toshkent shahar IIBB ushbu to‘siqlar yo‘l harakati xavfsizligini ta’minlash maqsadida o‘rnatilganini ma’lum qilgan. Obodonlashtirish bosh boshqarmasining Yo‘l bo‘limi ma’lumotlariga ko‘ra, yil boshidan buyon bu yo‘lakda sodir bo‘lgan yo‘l-transport hodisalari oqibatida 5 kishi vafot etgan.