O‘zbekiston tijorat banklaridagi davlat ulushi 2017-yilda Tiklanish va taraqqiyot fondi mablag‘lari hisobiga 500 million dollar ekvivalentidagi summaga oshiriladi. Bu O‘zbekiston Prezidenti Shavkat Mirziyoyev tomonidan imzolangan va davlat rahbari rasmiy saytida joylashtirilgan qarorda ko‘zda tutilgan.
Qarorda banklarda fond ulushini shakllantirish va ko‘paytirishga yo‘naltiriladigan mablag‘lar 2017—2018-yillarda hududlarni ijtimoiy-iqtisodiy rivojlantirishning tasdiqlangan manzilli dasturlarini moliyalashtirish (hamkorlikda moliyalashtirish) va tadbirkorlik subyektlarini moliyaviy qo‘llab-quvvatlash uchun foydalanilishi belgilangan.
Fond va Markaziy bankka bir hafta muddatda mablag‘larni tijorat banklari nizom kapitaliga o‘tkazib berilishini ta’minlash topshirilgan.
Markaziy bankka tijorat banklarida likvidlik yetishmovchiligi yuzaga kelgan taqdirda ularga uch oy muddatgacha ta’minotsiz kredit ajratish mexanizmini joriy etish yuklatildi. Mazkur kreditlar faqat to‘lovlar uzluksizligini ta’minlashga yo‘naltiriladi.
Markaziy bankka kreditlar olinganidan keyin ham mijozlar to‘lovlari uzluksizligini ta’minlamagan tijorat banklari ustidan vasiylik o‘rnatish huquqi berildi.
Izoh (0)