Ўзбекистон тижорат банкларидаги давлат улуши 2017 йилда Тикланиш ва тараққиёт фонди маблағлари ҳисобига 500 миллион доллар эквивалентидаги суммага оширилади. Бу Ўзбекистон Президенти Шавкат Мирзиёев томонидан имзоланган ва давлат раҳбари расмий сайтида жойлаштирилган қарорда кўзда тутилган.
Қарорда банкларда фонд улушини шакллантириш ва кўпайтиришга йўналтириладиган маблағлар 2017—2018 йилларда ҳудудларни ижтимоий-иқтисодий ривожлантиришнинг тасдиқланган манзилли дастурларини молиялаштириш (ҳамкорликда молиялаштириш) ва тадбиркорлик субъектларини молиявий қўллаб-қувватлаш учун фойдаланилиши белгиланган.
Фонд ва Марказий банкка бир ҳафта муддатда маблағларни тижорат банклари низом капиталига ўтказиб берилишини таъминлаш топширилган.
Марказий банкка тижорат банкларида ликвидлик етишмовчилиги юзага келган тақдирда уларга уч ой муддатгача таъминотсиз кредит ажратиш механизмини жорий этиш юклатилди. Мазкур кредитлар фақат тўловлар узлуксизлигини таъминлашга йўналтирилади.
Марказий банкка кредитлар олинганидан кейин ҳам мижозлар тўловлари узлуксизлигини таъминламаган тижорат банклари устидан васийлик ўрнатиш ҳуқуқи берилди.
Изоҳ (0)