Amerikalik rejissor Oliver Stoun Rossiya prezidenti Vladimir Putin bilan hujjatli film uchun intervyu chog‘ida uning kabinetidagi stol ustida “AQShning hikoya qilinmagan tarixi” kitobi turganini ko‘rib qoldi. Bu haqda “TASS” xabar bermoqda.
“Bu axir mening kitobim. Ajoyib. AQSh tarixi haqidagi ushbu kitobni hammualliflikda yozgandik”, — deydi rejissor kitobni qo‘liga olar ekan.
Rossiya prezidenti Stoun uchun uchta xonadan iborat ish kabineti bo‘ylab ekskursiya uyushtirdi. Uchinchi xonada rejissorning e’tiborini ikki yozuv stoli tortdi.
“Bu yerda hujjatlar ustida ishlayman. Shu sababli u odatda qog‘ozlarga to‘la bo‘ladi”, — dedi Rossiya prezidenti ulardan birini ko‘rsatib. Stoun aynan uning ustida o‘z kitobini topib oldi.
Oliver Stoun Vashingtondagi yadro tadqiqotlari instituti direktori, tarix professori Piter Kuznik bilan birgalikda yozgan “AQShning hikoya qilinmagan tarixi” kitobi 2014-yil sentabrida Rossiyada chop etildi. Unda mualliflar Qo‘shma Shtatlarning tashqi va ichki siyosatini tanqidiy tahlil qilgan.
Eslatib o‘tamiz, Oliver Stounning “Putin bilan intervyu” nomli 4 qismli filmi AQShda 12-iyundan boshlab Showtime telekanalida namoyish etilmoqda.
Izoh (0)