Saudiya Arabistoni tashqi ishlar vaziri Odil al-Jubayr Ar-Riyod Qatarni qamal qilganini inkor etdi. Bu haqda “TASS” xabar bermoqda.
“Buni qamal deyish noto‘g‘ri. Biz havo hududimizdan foydalanishni man etishdan iborat suveren huquqimizni qo‘llayapmiz, xolos. Oilalarga davlatdan-davlatga o‘tishga ruxsat berdik, ularni ajratayotganimiz yo‘q. Zarur bo‘lsa, Qatarga oziq-ovqat va dori-darmon yetkazib berishga ham tayyormiz”, — dedi diplomat AQSh Davlat kotibi Reks Tillerson bilan uchrashuvi oldidan.
Vazirning aytishicha, Qatar portlari va aeroportlari ochiq, ular qamal qilinmagan, joriy etilgan taqiq esa faqat Qatar samolyotlariga tegishli.
Eslatib o‘tamiz, oldinroq Saudiya Arabistoni uchinchi davlat aviakompaniyalariga Qatarga reyslarni bajarish chog‘ida mamlakat havo hududi va aeroportlaridan foydalanishga ruxsat bergani ma’lum qilingandi.
Izoh (0)