Shavkat Mirziyoyev sudlarda byurokratik o‘zboshimchalikni to‘xtatishni talab qildi

Prezident Shavkat Mirziyoyev 13-iyun kuni sud organlarida adolatni ta’minlash borasidagi ishlarga bag‘ishlangan videoselektor yig‘ilishini o‘tkazdi. Bu haqda, “O‘zbekiston” telekanalining “Axborot” dasturiga asoslanib, “Gazeta.uz” xabar bermoqda.

“Asosiy maqsadimiz — fuqarolarning huquq va erkinliklarini himoya qilish hamda sudni asl adolat maskaniga aylantirish yo‘li bilan xalqning sud tizimiga bo‘lgan ishonchini mustahkamlash”, — ta’kidladi Shavkat Mirziyoyev.

Uning aytishicha, asosiy vazifalardan biri kuchli iroda, yuksak professional va axloqiy sifatlarga ega, har tomonlama o‘ylangan va adolatli qarorlar qabul qila oladigan sudyalar korpusini shakllantirishdir.

“O‘z sohasini mukammal bilmaydigan, professional ko‘nikmalar va hayotiy tajribaga, yuksak axloqiy sifatlarga ega bo‘lmagan yuristlar hech qachon bu mansabga tayinlanmasligi lozim”, — qayd qilib o‘tdi davlat rahbari.

Sudyalar tomonidan qonunga zid harakatlarning sodir etilishi, korrupsiya, insonlarning tashvishiga nisbatan befarqlik, adolat prinsipini buzuvchi qarorlarning qabul qilinishi qattiq tanqid ostiga olindi.

“O‘zbekiston Respublikasi Oliy sudining sobiq rahbarlari ushbu muhim masalalarga o‘z vaqtida e’tibor qaratmagani bois sohada jiddiy kamchiliklar yuzaga keldi”, — deyildi reportajda.

Prezident sudlarda byurokratik o‘zboshimchalikka chek qo‘yish hamda ishlarning o‘z vaqtida ko‘rib chiqilmasligiga, sarsonlikka yo‘l qo‘yuvchi ishchilarga tegishli baho berish zarurligini ta’kidladi.

Yig‘ilish ishtirokchilari davlat rahbarining taklifini qo‘llab-quvvatladi hamda oyida kamida bir marta xalq bilan muloqot olib borilishi lozimligini yoqlab chiqdi.

“Endi sudyalar faoliyatiga xalqning o‘zi baho beradi”, — dedi Shavkat Mirziyoyev.

Sud sohasi kadrlarini tayyorlash ishini yaxshilash uchun Prezident maxsus o‘quv muassasasi — adliya akademiyasini tashkil etishni taklif qildi.

Bundan tashqari, mahallalar, korxonalar va tashkilotlarda ko‘cha sud yig‘ilishlari o‘tkazish amaliyotini kengaytirish, sud organlari faoliyatiga axborot-kommunikatsion texnologiyalarni joriy qilish belgilandi.