Президент Шавкат Мирзиёев 13 июнь куни суд органларида адолатни таъминлаш борасидаги ишларга бағишланган видеоселектор йиғилишини ўтказди. Бу ҳақда, «Ўзбекистон» телеканалининг «Ахборот» дастурига асосланиб, «Газета.uz» хабар бермоқда.
«Асосий мақсадимиз — фуқароларнинг ҳуқуқ ва эркинликларини ҳимоя қилиш ҳамда судни асл адолат масканига айлантириш йўли билан халқнинг суд тизимига бўлган ишончини мустаҳкамлаш», — таъкидлади Шавкат Мирзиёев.
Унинг айтишича, асосий вазифалардан бири кучли ирода, юксак профессионал ва ахлоқий сифатларга эга, ҳар томонлама ўйланган ва адолатли қарорлар қабул қила оладиган судьялар корпусини шакллантиришдир.
«Ўз соҳасини мукаммал билмайдиган, профессионал кўникмалар ва ҳаётий тажрибага, юксак ахлоқий сифатларга эга бўлмаган юристлар ҳеч қачон бу мансабга тайинланмаслиги лозим», — қайд қилиб ўтди давлат раҳбари.
Судьялар томонидан қонунга зид ҳаракатларнинг содир этилиши, коррупция, инсонларнинг ташвишига нисбатан бефарқлик, адолат принципини бузувчи қарорларнинг қабул қилиниши қаттиқ танқид остига олинди.
«Ўзбекистон Республикаси Олий судининг собиқ раҳбарлари ушбу муҳим масалаларга ўз вақтида эътибор қаратмагани боис соҳада жиддий камчиликлар юзага келди», — дейилди репортажда.
Президент судларда бюрократик ўзбошимчаликка чек қўйиш ҳамда ишларнинг ўз вақтида кўриб чиқилмаслигига, сарсонликка йўл қўювчи ишчиларга тегишли баҳо бериш зарурлигини таъкидлади.
Йиғилиш иштирокчилари давлат раҳбарининг таклифини қўллаб-қувватлади ҳамда ойида камида бир марта халқ билан мулоқот олиб борилиши лозимлигини ёқлаб чиқди.
«Энди судьялар фаолиятига халқнинг ўзи баҳо беради», — деди Шавкат Мирзиёев.
Суд соҳаси кадрларини тайёрлаш ишини яхшилаш учун Президент махсус ўқув муассасаси — адлия академиясини ташкил этишни таклиф қилди.
Бундан ташқари, маҳаллалар, корхоналар ва ташкилотларда кўча суд йиғилишлари ўтказиш амалиётини кенгайтириш, суд органлари фаолиятига ахборот-коммуникацион технологияларни жорий қилиш белгиланди.
Изоҳ (0)