O‘zbekiston Respublikasi Tashqi ishlar vaziri Abdulaziz Komilov BMT bosh kotibi Antoniu Guterrishning O‘zbekistonga tashrifi yakunlari to‘g‘risida bayonot berdi, deb yozadi TIV rasmiy sayti.
Bu mavzuda “O‘zbekiston” telekanaliga bergan intervyusida vazir Prezident bilan o‘tkazilgan muzokaralarda ko‘plab dolzarb masalalar ko‘tarilganini qayd etdi.
“Birinchidan, mintaqadagi vaziyat, Afg‘oniston, xavfsizlik muammolari. Ikkinchidan, mintaqaviy hamkorlik, uchinchidan suv masalalari. To‘rtinchidan, ekologiya masalalari, Orolbo‘yidagi masalalar bo‘yicha hamkorlikni ko‘rib chiqishdi”, — deya Abdulaziz Komilov muzokaralarda qanday masalalarga to‘xtalib o‘tilganini qisqacha izohladi.
Uning aytishicha, BMT bosh kotibi tashkilot tomonidan tayyorlanib, tarqatilgan ikkita yirik konvensiya — Amudaryo va Sirdaryo bo‘yicha — borasida to‘liq ma’lumot bergan. Guterrish Markaziy Osiyoning boshqa mamlakatlariga borganida ham shu masalani ko‘taradi, dedi vazir.
“Ushbu ikkita konvensiyani amalga oshirishda BMT Markaziy Oziyo mamlakatlari bilan birga ishlashga tayyor. Bu juda katta yutuq, chunki bu masala 20—25 yildan buyon kun tartibida bor, ammo birorta siljish, birorta ijobiy natijaga erishilgani yo‘q. Agar biz buni oxirigacha olib borib hal qilsak, bu juda katta yutuq bo‘ladi”, — deya ta’kidladi Abdulaziz Komilov.
Izoh (0)