Ўзбекистон Республикаси Ташқи ишлар вазири Абдулазиз Комилов БМТ бош котиби Антониу Гутерришнинг Ўзбекистонга ташрифи якунлари тўғрисида баёнот берди, деб ёзади ТИВ расмий сайти.
Бу мавзуда «Ўзбекистон» телеканалига берган интервьюсида вазир Президент билан ўтказилган музокараларда кўплаб долзарб масалалар кўтарилганини қайд этди.
«Биринчидан, минтақадаги вазият, Афғонистон, хавфсизлик муаммолари. Иккинчидан, минтақавий ҳамкорлик, учинчидан сув масалалари. Тўртинчидан, экология масалалари, Оролбўйидаги масалалар бўйича ҳамкорликни кўриб чиқишди», — дея Абдулазиз Комилов музокараларда қандай масалаларга тўхталиб ўтилганини қисқача изоҳлади.
Унинг айтишича, БМТ бош котиби ташкилот томонидан тайёрланиб, тарқатилган иккита йирик конвенция — Амударё ва Сирдарё бўйича — борасида тўлиқ маълумот берган. Гутерриш Марказий Осиёнинг бошқа мамлакатларига борганида ҳам шу масалани кўтаради, деди вазир.
«Ушбу иккита конвенцияни амалга оширишда БМТ Марказий Озиё мамлакатлари билан бирга ишлашга тайёр. Бу жуда катта ютуқ, чунки бу масала 20—25 йилдан буён кун тартибида бор, аммо бирорта силжиш, бирорта ижобий натижага эришилгани йўқ. Агар биз буни охиригача олиб бориб ҳал қилсак, бу жуда катта ютуқ бўлади», — дея таъкидлади Абдулазиз Комилов.
Изоҳ (0)