Boeing kompaniyasi haydovchisiz tijorat yo‘lovchi samolyotlarini yaratish imkoniyatlarini ko‘rib chiqishga kirishdi, deb yozadi 3DNews. Ularning avtopilot tizimida parvoz chog‘ida qaror qabul qilish uchun sun’iy intellektdan foydalaniladi.
Parij aviashousi boshlanishi arafasida dunyodagi eng yirik samolyot ishlab chiqaruvchi kompaniya kelasi yili uchuvchisiz samolyotlar uchun texnologiyalarning ba’zilarini sinab ko‘rish niyatini ma’lum qildi. “Texnologiyalarni yaratish uchun tayanch bloklar mavjud”, — dedi Boeing 787 Dreamliner loyihasi sobiq bosh muhandisi va ayni paytda Boeing’ning bo‘lg‘usi innovatsion texnologiyalar uchun mas’ul bo‘lgan vitse-prezidenti Mayk Sinnett.
Haqiqatan ham, hozirdanoq avialaynerlar bort kompyuteri yordamida, inson aralashuvisiz, uchish va qo‘nishni amalga oshira oladi, shuningdek, avtopilotda parvoz qila oladi. Oddiy yo‘lovchi samolyotida esa uchuvchilar soni uchtadan ikkitaga kamaytirilgan.
Sobiq uchuvchi bo‘lgan Sinnett shu yozda trenajyorda sun’iy intellekt qo‘llanilgan yangi texnologiyani sinab ko‘rmoqchi, kelasi yilda esa texnologiya real sharoitlarda sinovdan o‘tkaziladi.
Izoh (0)