1994 — Rustam Akromov
Azamat Abduraimovning 1994-yilgi Osiyo o‘yinlarida Janubiy Koreya darvozasiga urgan golini eslasangiz kerak. O‘zbekiston finalga chiqishi uchun imkoniyat deyarli yo‘q edi. Rustam Akramov va Birodar Abduraimov murabbiylik qilgan jamoaning guruhdan chiqib olganiyoq ko‘pchilik uchun katta voqelik bo‘lgan bir paytda, futbolchilar qit’aning eng kuchli deya e’tirof etilayotgan jamoasini ham mag‘lub eta olgandi.Butun uchrashuv koreyaliklar ustunligida o‘tdi. Yuriy Sheykin darvozasi oldida yuzaga kelgan vaziyatlar qandaydir mo‘jiza tufayligina O‘zbekiston darvozasining ishg‘ol etilmasligi bilan tugayvergan. Va nihoyat bittagina aniq zarba O‘zbekistonni finalga olib chiqqandi. Mana shunday bir paytda koreyaliklarning ahvolini tasavvur qilish qiyin emas. Agar o‘sha uchrashuv yana besh marta o‘tkazilsa, hammasida Koreyaning qo‘li baland kelishi katta ehtimol edi. Biroq yutilishi kerak bo‘lgan o‘yinni favorit boy berib qo‘ydi. Dahshatli yarim finalni boshdan kechirgan O‘zbekiston esa finalda Xitoyni o‘z izmiga sola bildi.
1999 — Mahmud Rahimov
1999-yil Mahmud Rahimov jamoasi uzoq yillar davomida yoddan chiqmaydigan uchrashuv o‘tkazdi. Amirlik termasiga qarshi bellashuv bor-yo‘g‘i Osiyo kubogining saralashi doirasida edi, to‘g‘ri. Biroq undagi vaziyat va sharoitdan kelib chiqib, qozonilgan g‘alaba o‘sha saralashni peshqadam sifatida yakunlagan futbolchilarnida salkam qahramon darajasiga ko‘tardi.BAA saralash o‘yinlariga mezbonlik qilgan mamlakat sifatida Osiyo kubogiga yagona yo‘llanmani yutib olish uchun asosiy favorit sanalardi. Taqvim shunday tuzildiki, unda Amirlik termasining asosiy raqibi O‘zbekiston qoqilishi uchun barcha chora ko‘rildi. Sakkiz kun ichida to‘rtta o‘yinda maydonga tushish hazilakam ish emas, bunday holat faqat Osiyoda bo‘lishi mumkin. Raqiblar esa bosqichma-bosqich kuchayib borishi kerak edi. Avvalgi to‘rt kunda Bangladesh va Shri-Lanka termalari bir xilda — 6:0 hisobida taslim qilindi. Oltinchi kundagi uchinchi o‘yinning o‘ziyoq futbolchilarni toliqtirgandi. Bu narsa Hindiston bilan o‘yinda ham sezildi — 3:2. G‘alaba keltirgan gollar o‘yin tugashiga 15 daqiqa qolganida kiritildi. Hindiston bir tur avval dam olgani uchun ham, unga qarshilik ko‘rsatish Rahimov jamoasidan katta kuch talab qildi.
2012 — Vadim Abramov
Vadim Abramov murabbiylik qilgan jamoa 2012-yil Yaponiyadan g‘alaba bilan qaytgan kunni eslaymiz. Marhum Shadrin tomonidan urilgan gol va yana bir tarixiy g‘alaba. Yaponlar uchun 3 ochko u qadar shart emasdi, dersiz. Biroq kunchiqar yurt termasi o‘z maydonida mag‘lub bo‘lishni har qanday vaziyatda ham or deb biladi. Tojikistonga qarshi bellashuvda yetakchi futbolchilar sariq kartochkalar olib, Yaponiyaga qarshi o‘yinni qo‘yib yuboradigan bo‘lgandi. Shunga qaramay, asosiy futbolchilarsiz o‘ynagan O‘zbekiston termasi Yaponiyadan 3 ochko olib qaytdi.
2012 — Mirjalol Qosimov
2012-yil Mirjalol Qosimov murabbiylik qilgan jamoada ham tarixiy g‘alaba qayd etildi. Bunga qadar O‘zbekiston forslardan ustun kelishni uddalay olmagandi. Tojikistonga qarshi o‘yindagi ayyorlikni FIFA kechirmagani, asosiy futbolchilar Yaponiyadan keyin Eronga qarshi o‘yinni ham qo‘yib yuborgani, hakam yaqqol golni inobatga olmagani forslarning Toshkentdan g‘alaba bilan qaytishiga, Vadim Abramovning esa iste’fosiga sabab bo‘lgandi.
Javob o‘yinida Qosimov boshchilik qilgan jamoa “Ozodi” stadionida 3 ochko ishlab oldi. Standart vaziyat, Ulug‘bek Baqoyevning 71-daqiqadagi goli. Biz ungacha ham, undan keyin ham Eronni qaytib mag‘lub eta olmadik.
To‘g‘ri, keyinroq O‘zbekiston baribir 2014-yilgi Jahon chempionatidan chetda qoldi. Amirliklardagi qahramonlikdan keyin Osiyo kubogi biz uchun sharmandali o‘tgani ham rost. Abramovning Yaponiyadagi g‘alabasi deyarli changga aylanib ketdi. 1994-yilgi g‘alabadan keyin esa O‘zbekiston termasi katta g‘alabalarga qaytib yaqinlashmadi. Biroq o‘sha 90 daqiqali o‘yinlar xotiramizda uzoq muddat saqlanib qoldi.2017 — navbat Babayanga
Men buni nega esladim? Bugun Babayan jamoasi xuddi yuqoridagilar kabi sinovdan o‘tadi. U qo‘li ostidagi jamoa tarixdagi eng kuchlisi ekani haqida aytishdan charchamadi. Endi esa tarkibiga kuchli iroda, metin himoya, yaxshi taktika va futbolchilar ko‘zidagi o‘t juda kerak. Hozir o‘zbekistonlik muxlislar futbolchilardan umidvor. Marhamat, janob Babayan, navbat sizniki.
Izoh (0)