AQSh va Fors ko‘rfazi arab davlatlari terrorga qarshi kurashni kuchaytirish hamda Eronning mintaqadagi boshqa davlatlar ichki ishlariga aralashuvini tiyib turishda hamkorlik qilish borasida kelishuvga erishdi. Bu haqda ar-Riyodda bo‘lib o‘tgan Arab-musulmon davlatlari va AQSh sammitining yakuniy kommyunikesida aytib o‘tildi, deb xabar beradi “TASS”.
Hujjatning Al Arabiya telekanalida keltirilgan parchalariga binoan, AQSh va arab monarxiyalari Eronning mintaqadagi boshqa davlatlar ishiga aralashuvini qat’iyan qoralaydi. AQSh boshchiligidagi alyans tarkibiga kiruvchi olti arab davlati yetakchilarining Tramp bilan uchrashuvi 21-may, yakshanba kuni matbuot uchun yopiq rejimda o‘tkazildi.
Tomonlar konfessiyalararo ziddiyatlar va mintaqaviy beqarorlikka qarshi sa’y-harakatlarni oshirish, IShID guruhini yo‘q qilish borasidagi hamkorlik singari masalalar yuzasidan kelishuvga erishdi. Bu masalada yarim yilda bir marta terrorga qarshi qo‘shma harakatlarga bag‘ishlangan yig‘ilishlar o‘tkazishga kelishib olindi.
Vashington Bahrayn, Qatar, Kuvayt, BAA, Ummon va Saudiya Arabistonini har qanday tahdidlardan himoya qilishga tayyorligini bildirdi, shuningdek, Eronda raketa dasturining davom ettirilishi mintaqa davlatlariga xavf tug‘dirayotganini ta’kidladi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)