Rossiya tergov organlari Kemerovo viloyatining Berezovskiy shahrida uyning to‘rtinchi qavatidan sakragan qizaloqning jarohat olishi bo‘yicha vaziyatni o‘rganmoqda. Bu haqda Rossiya tergov qo‘mitasining mintaqa bo‘yicha boshqarmasi matbuot xizmatiga tayanib, “Interfaks” xabar berdi.
Olti yoshli qizaloq turli jarohatlar bilan 18-may kuni shifoxonaga olib kelingan. Qizaloqni ko‘p qavatli uy yonidan qo‘shnilari topib olgan, undan sal narida ochiq turgan soyabon yotgan.
“Ayni vaqtda jabrlanuvchining sog‘lig‘iga hech nima xavf solmayapti”, — deya ta’kidlandi xabarda.
Dastlabki ma’lumotlarga ko‘ra, qizcha bosh qahramoni soyabon yordamida uchadigan filmni tomosha qilgan. Bobosi qizaloqni uyda yolg‘iz qoldirgan vaqtda esa u soyabonni olgan va kinoda ko‘rgan parvozini sinab ko‘rish maqsadida to‘rtinchi qavatdan sakragan.
Ta’kidlanishicha, qizcha bobosi va buvisi bilan yashagan.
Izoh (0)