O‘zbekiston Prezidenti qarori (pdf) bilan Ichki ishlar organlarining jamoat tartibini saqlash va jamoat xavfsizligini ta’minlash sohasidagi faoliyatini tubdan takomillashtirish chora-tadbirlari tasdiqlandi, deb yozadi Norma.
Ichki ishlar vazirligi Patrul-post xizmati va jamoat tartibini saqlash bosh boshqarmasi ichki ishlar organlari bo‘linmalari, vazirlik va idoralarning jamoat tartibini saqlash va jamoat xavfsizligini ta’minlash, shuningdek, ommaviy tadbirlarga tayyorgarlik ko‘rish va ularni o‘tkazish masalalari bo‘yicha faoliyatini muvofiqlashtirishni va unga tashkiliy-uslubiy rahbarlikni amalga oshiradi.
Patrul-post xizmati saf bo‘linmalarining javobgarlik hududlariga kirmaydigan joylarda jamoat tartibini va xavfsizlikni ta’minlash tuman (shahar) ichki ishlar boshqarmalari (bo‘limlari), shu jumladan, profilaktika inspektorlari zimmasiga yuklatiladi.
Toshkent shahar ichki ishlar bosh boshqarmasi Patrul-post xizmati va jamoat tartibini saqlash boshqarmasining Patrul-post xizmati brigadasi tarkibida o‘rnatilgan umumiy shtatlar soni doirasida 50 bosh xizmat otlari biriktirilgan Otliq otryad tuziladi va u IIV Harbiy-texnika institutining yozgi poligoni bazasiga joylashtiriladi. Uning asosiy vazifalari quyidagicha bo‘ladi:
- ochiq joylarda o‘tkaziladigan ommaviy tadbirlar chog‘ida jamoat tartibini saqlash va jamoat xavfsizligini ta’minlashda yuqori harakatchanlik hamda mobil to‘siqlar va halqalarning tashkil etilishini ta’minlash;
- Toshkent shahrining markaziy ko‘chalari, dam olish zonalari va aholi gavjum bo‘ladigan boshqa joylarda jamoat tartibini saqlash va fuqarolar xavfsizligini ta’minlash, huquqbuzarlarni ushlash bo‘yicha kechiktirib bo‘lmaydigan choralarni ko‘rish;
- xodimlarga yilqichilik asoslarini va ot minib yurish ko‘nikmalarini o‘rgatishni tashkil etish, ushbu sohadagi ijobiy xorijiy tajribani o‘rganish va amaliyotga joriy etish, ekstremal vaziyatlarda xizmat otlarini tayyorlash usullari va ulardan foydalanish taktikasini takomillashtirish.
Izoh (0)