O‘zbekiston Respublikasi Xalq ta’limi vazirligi tomonidan umumta’lim maktablarining 9-sinf o‘quvchilari o‘rtasida tashkil etilgan “Islom Karimov asarlari bilimdoni” ko‘rik-tanlovining mamlakat bosqichi yakunlandi. Bu haqda O‘zA xabar bermoqda.
O‘zbekiston Prezidenti Shavkat Mirziyoyevning 2017-yil 25-yanvardagi “O‘zbekiston Respublikasining Birinchi Prezidenti Islom Abdug‘aniyevich Karimovning xotirasini abadiylashtirish to‘g‘risida”gi qarori ijrosi doirasida o‘tkazilgan tanlovda Qoraqalpog‘iston Respublikasi, viloyatlar va Toshkent shahri bosqichlari g‘oliblari bahslashdi.
“Ishtirokchilarning Birinchi Prezidentimiz asarlariga doir ijodiy ishi, mamlakatimiz Konstitutsiyasi, yurtimiz ijtimoiy-siyosiy hayotidagi muhim voqealar bo‘yicha bilimi hakamlar hay’ati tomonidan baholab borildi”, — deyiladi xabarda.
Navoiy shahridagi 11-umumta’lim maktabi o‘quvchisi Aziza Botirova birinchi o‘rinni egalladi.
“Birinchi Prezidentimiz Islom Karimovning asarlarida milliy g‘oya va mafkuramizning asosiy tamoyillari, mamlakatimiz ravnaqi va yoshlar kelajagi borasida konseptual fikrlar jamlangan. Asarlarning umumta’lim maktablaridanoq o‘rganilayotganligi o‘quvchilarning ijtimoiy-siyosiy faolligini oshirish va ularda vatanparvarlik tuyg‘usini rivojlantirishga xizmat qilmoqda”, – deydi Azizaning o‘qituvchisi Abduvali Xoliqov.
G‘olib va sovrindorlar Xalq ta’limi vazirligining sovg‘alari va faxriy yorliqlari bilan taqdirlandi.
Izoh (0)