69 yoshli Dik Advokat futbol bo‘yicha Gollandiya milliy terma jamoasiga bosh murabbiy etib tayinlandi, deb yozdi “Chempionat” nashri.
Shartnoma JCh—2018 saralash bosqichining yakunida tugaydi. Bu vaqt davomida Advokatga gollandiyalik afsonaviy futbolchilardan biri Rud Gullit yordam beradi.
Har ikki mutaxassis o‘z vaqtida Rossiyada faoliyat olib borib, muvaffaqiyatga erisha olmagandi. Advokat Sankt-Peturburgning “Zenit” klubi va Rossiya termasida ishlagan bo‘lsa, Gullit “Terek” klubini boshqargan.
Ayni vaqtda Advokat Turkiyaning “Fenerbaxche” klubi bosh murabbiyi hisoblanadi. Shartnoma shu yilning yoziga qadar mo‘ljallangan bo‘lib, Advokat uni uzaytirmaslikka qaror qilgan.
Gollandiya terma jamoasi JCh—2018 saralashi doirasida 5 ta uchrashuv o‘tkazib, 7 ochko to‘pladi. Bu esa Fransiya (13), Shvetsiya (10) va Bolgariya (9) termalaridan keyin to‘rtinchi bo‘lib turishgagina xizmat qilmoqda. Advokatning oldiga gollandlarni minimum ikkinchi o‘ringa ko‘tarib, Rossiya—2018 mundialiga yo‘llanma olish vazifasi qo‘yildi.
Bu qiziq
Dik Avokat bunga qadar ham Gollandiya terma jamoasida faoliyat olib borgan. 1992—1994-yillar oralig‘ida u termani JCh—1994 chorak finaliga qadar olib keldi va yarim final ostonasida Braziliyadan yengildi — 2:3.2002—2004-yilgi faoliyatida esa Advokat Gollandiya bilan Yevro—2004 musobaqasining yarim finalida o‘ynadi. O‘shanda mezbon portugaliyadan mag‘lubiyat qabul qilib olingandi — 1:2.
Ma’lumot uchun, Dik Advokat Gollandiya terma jamoasini qabul qilib olgan eng qari mutaxassisga aylandi. 2015-yilning iyunida iste’fo bergan Guus Xiddink termani qabul qilib olganida 68 yoshda edi. Advokat esa shu yilning 27-sentabr kuni 70 yoshni qarshi oladi.
Izoh (0)