Facebook ijtimoiy tarmog‘i foydalanuvchilari guruhida Multi MaFé restoran kompleksi tomonidan “Cho‘qintirgan ota” filmidagi parchalardan foydalanib joylashtirilgan reklama olib tashlandi, deb xabar berdi Respublika Xususiylashtirish, monopoliyadan chiqarish va raqobatni rivojlantirish Davlat qo‘mitasi matbuot xizmati.
Ushbu reklamada “Hatto Vito Karleone ham Multi MaFé’ni tavsiya qiladi” deyilgan va “Cho‘qintirgan ota” filmidagi bosh qahramon — Marlon Brando surati ko‘rsatilgan.
O‘zbekiston Respublikasining “Reklama borasida”gi Qonuniga binoan, reklamada boshqa mahsulot reklamasida foydalanilgan umumiy qaror, matn, tasvir, musiqiy effektlar, agarda mualliflik huquqi va turdosh huquqlar to‘g‘risidagi qonun hujjatlarida nazarda tutilgan bo‘lsa, taqlid qilish (nusxa ko‘chirish va o‘xshatib ishlash) taqiqlanadi. Shuningdek, jismoniy shaxs ruxsatisiz uning ismi yoki suratidan foydalanish ham taqiqlanadi.
Shundan kelib chiqib, O‘zbekiston Respublikasining Xususiylashtirish, monopoliyadan chiqarish va raqobatni rivojlantirish Davlat qo‘mitasi Multi MaFé restoran kompleksining reklamasi sabab ularga reklama qonunchiligida belgilangan mualliflik huquqi yoki turdosh huquqlar borasida xat yubordi.
Multi MaFé restoran kompleksi xatni olishi bilan “Cho‘qintirgan ota” filmi parchalaridan foydalanib ishlangan reklamani o‘chirib tashladi.
Multi MaFé restorani xo‘jayinlariga kelgusida bu kabi qonun buzilishiga yo‘q qo‘ymasliklari borasida ogohlantirish berildi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)