United Airlines inqirozdan chiqishning o‘n punktini ishlab chiqdi

Oxirgi paytlarda AQShning United Airlines aviakompaniya media nigohiga faqat salbiy yangiliklar sabab tushib qolmoqda. Yo‘lovchilarning kaltaklanishi, rekordchi quyonning vafoti, legginslardagi qizlarning salonga kiritilmasligi, mijozlar bilan sud tortishuvlari va hokazo voqealar shular jumlasidandir.

Aprel oyining oxirida aviakompaniya bo‘layotgan ishlar javob tariqasida o‘n punktdan iborat imijni qutqarish rejasini ishlab chiqdi. Bu punktlar bundan buyon bunday voqealarga yo‘l qo‘ymaslikka yordam berishi nazarda tutilmoqda.

Meduza ushbu aksilinqiroz rejasi punktlarini keltirdi:

1. Yo‘lovchilarga nisbatan xatar tug‘ilgan taqdirdagina huquq-tartibot idoralariga murojaat qilish;
2. O‘z o‘rinlarini egallab bo‘lgan yo‘lovchilardan bortni tark etishni so‘ramaslik;
3. Joriy reysda uchmaslikka rozi bo‘lgan yo‘lovchilarga beriladigan badal pulini 10 ming dollarga yetkazish;
4. Yo‘lovchilarning muammolarini hal qilish bo‘yicha komissiya tuzish. Uning a’zolari mijozlarga qo‘shni aeroportlar, boshqa kompaniyalar reyslari yoki yer transporti yordamida kerakli manzilga yetib olishni tavsiya qiladi;
5. Ish bo‘yicha boshqa shaharga borishi lozim bo‘lgan ekipaj a’zolarini ular jo‘nashidan kamida bir soat oldin ro‘yxatga olish;
6. Har yili xodimlar bilan murakkab vaziyatlarda ishlash bo‘yicha qo‘shimcha mashg‘ulotlar o‘tkazish;
7. Mijozlarni o‘z rejalarini o‘zgartirishga ko‘ndiruvchi avtomatlashgan tizim yaratish;
8. Overbuking hajmini kichraytirish. Overbuking — aviakompaniya aybi bilan reysga samolyot ko‘tara oladiganidan ortiq yo‘lovchi chipta olishi;
9. Aviakompaniya xodimlariga yo‘lovchilarning muammolarini darhol hal etish imkoniyatini berish;
10. Butunlay yo‘qolgan yuk yoki uning ichidagi buyumlar uchun bir yarim ming dollar miqdorida badal puli to‘lash.