Yuk mashinalarining Qamchiq dovonidan o‘tishi taqiqlandi

O‘zbekiston hukumati Qamchiq dovoni orqali bitta yetaklovchi o‘qqa 11,5 tonnadan ortiq yuk to‘g‘ri keladigan yuk avtomobillari bilan yuk olib o‘tishni taqiqladi, deb yozadi UzDaily hukumatning “A-373 avtomobil yo‘lining Qamchiq dovonidan o‘tuvchi qismidan samarali foydalanish chora-tadbirlari to‘g‘risida”gi qaroriga tayanib.

Hujjatda aytilishicha, “Chinor” (Toshkent viloyati Ohangaron tumani) va “Sherobod” (Namangan viloyati Pop tumani) postlarida avtotransport vositalarining og‘irlik va gabarit o‘lchamlarini, shu jumladan, yetaklovchi o‘q yuklamalarini tekshirish bo‘yicha zamonaviy uskunalar o‘rnatiladi.

Hujjatga muvofiq, bitta yetaklovchi o‘qqa tushadigan og‘irlik parametrlari bo‘linmaydigan katta gabaritli va og‘ir yuklarni vakolatli organlarning maxsus ruxsatlari bilan olib o‘tayotgan, shuningdek, Qamchiq dovonida yo‘l-transport infratuzilmasi obyektlarini qurish, rekonstruksiya qilish, ta’mirlash bo‘yicha ishlarni amalga oshirish uchun jalb qilingan yuk avtotransport vositalari uchun amal qilmaydi.

Ushbu taqiq 2017-yil 1-iyuldan kuchga kiradi.