Jahon banki O‘zbekiston oliy ta’lim tizimi modernizatsiyasi uchun kredit ajratdi

Jahon banki va O‘zbekiston hukumati oliy ta’lim tizimini modernizatsiya qilish loyihasi kredit kelishuvini imzoladi. Bu haqda “Gazeta.uz” xabar bermoqda.

2017—2022-yillarga mo‘ljallangan loyihani amalga oshirilishi uchun Oliy va o‘rta ta’lim vazirligi mas’ul, Jahon banki esa texnik jihatdan qo‘llab-quvvatlaydi.

Loyiha doirasida oliy ta’lim boshqaruvining axborot tizimi joriy etilishi, ayrim o‘quv yurtlarida ilmiy laboratoriyalar modernizatsiyasi, milliy elektron kutubxona yaratilishi, akademik innovatsiyalar tanlov fondining moliyalashtirilishi ko‘zda tutilmoqda.

Kredit Jahon banki bo‘linmasi — Taraqqiyot xalqaro assotsiatsiyasi tomonidan 25 yilga taqdim etiladi. O‘zbekiston hukumati o‘z mablag‘i hisobidan qo‘shimcha sheriklik hissasini qo‘shadi va shu tariqa loyihaning umumiy qiymati 50 million dollarni tashkil etadi. “Daryo”ning Telegram’dagi rasmiy kanali — @toshqindaryo’ga a’zo bo‘ling!