Toshkеntda “Poytaxt bank” aksionеrlik tijorat turar joy-qurilish jamg‘arma banki tashkil etilmoqda, dеb xabar qildi “Gazeta.uz” O‘zbеkiston Markaziy banki matbuot xizmatiga tayangan holda.
Uning ochilishi Prеzidеntning 2017-yil 13-martdagi “Toshkеntda 2017—2021 yillarda arzon ko‘p xonali uylarni qurish miqyosini kеngaytirish bo‘yicha qo‘shimcha chora-tadbirlar to‘g‘risida”gi qarorida o‘z aksini topgan.
“Poytaxt bank” binosi Olmazor tumanining Bеruniy ko‘chasi 43-uyda joylashadi. Uning asosiy vazifalari va yo‘nalishlari etib quyidagilar belgilandi:
- aholi va yuridik shaxslarning turar-joyga bo‘lgan ehtiyojini qondirishda ipoteka kreditlarini ajratish va bank xizmatlarini ko‘rsatish;
- arzon ko‘p kvartirali uylarni quruvchi pudratchi tashkilotlarga kredit resurslarini ajratish;
- arzon ko‘p kvartirali uylarni loyihalash va qurishda buyurtmachi vazifalarini bajarish;
- Toshkentda ko‘p qavatli uylarni qurish va ta’mirlash bilan shug‘ullanuvchi ixtisoslashgan pudratchi tashkilotlarga kreditlar ajratish va lizing xizmatlarini ko‘rsatish;
- arzon ko‘p kvartirali uylar qurilishini moliyalashda xorijiy investitsiyalar, jumladan kreditlarni jalb etish, xalqaro moliya institutlari bilan texnik hamkorlik olib borish;
- muhandislik infratuzilmalari sifatini yaxshilashni ko‘zda tutuvchi loyihalarni ishlab chiqish va amalga oshirishni moliyalashni o‘z ichiga olgan investitsion faoliyatni olib borish;
- zamonaviy, foydali, energiya tejovchi va xaridorgir qurilish materiallari va uskunalarini ishlab chiqaruvchi tashkilotlarga kreditlar ajratish;
- universal tijorat banki sifatida yuridik va jismoniy shaxslarga boshqa bank xizmatlarini ko‘rsatish.
Izoh (0)