Тошкентда «Пойтахт банк» акционерлик тижорат турар жой-қурилиш жамғарма банки ташкил этилмоқда, деб хабар қилди «Газета.uz» Ўзбекистон Марказий банки матбуот хизматига таянган ҳолда.
Унинг очилиши Президентнинг 2017 йил 13 мартдаги «Тошкентда 2017—2021 йилларда арзон кўп хонали уйларни қуриш миқёсини кенгайтириш бўйича қўшимча чора-тадбирлар тўғрисида»ги қарорида ўз аксини топган.
«Пойтахт банк» биноси Олмазор туманининг Беруний кўчаси 43-уйда жойлашади. Унинг асосий вазифалари ва йўналишлари этиб қуйидагилар белгиланди:
- аҳоли ва юридик шахсларнинг турар-жойга бўлган эҳтиёжини қондиришда ипотека кредитларини ажратиш ва банк хизматларини кўрсатиш;
- арзон кўп квартирали уйларни қурувчи пудратчи ташкилотларга кредит ресурсларини ажратиш;
- арзон кўп квартирали уйларни лойиҳалаш ва қуришда буюртмачи вазифаларини бажариш;
- Тошкентда кўп қаватли уйларни қуриш ва таъмирлаш билан шуғулланувчи ихтисослашган пудратчи ташкилотларга кредитлар ажратиш ва лизинг хизматларини кўрсатиш;
- арзон кўп квартирали уйлар қурилишини молиялашда хорижий инвестициялар, жумладан кредитларни жалб этиш, халқаро молия институтлари билан техник ҳамкорлик олиб бориш;
- муҳандислик инфратузилмалари сифатини яхшилашни кўзда тутувчи лойиҳаларни ишлаб чиқиш ва амалга оширишни молиялашни ўз ичига олган инвестицион фаолиятни олиб бориш;
- замонавий, фойдали, энергия тежовчи ва харидоргир қурилиш материаллари ва ускуналарини ишлаб чиқарувчи ташкилотларга кредитлар ажратиш;
- универсал тижорат банки сифатида юридик ва жисмоний шахсларга бошқа банк хизматларини кўрсатиш.
Изоҳ (0)