Osiyo Chempionlar ligasining guruh bosqichiga chiqish ilinjida Saudiya Arabistoniga tashrif buyurgan Qarshining “Nasaf” klubi ortga quruq qo‘l bilan qaytadigan bo‘ldi. Pley-off doirasida “Al-Fotih” klubiga qarshi kurash olib borgan Ro‘ziqul Berdiyev murabbiyligidagi jamoa 0:1 hisobida imkoniyatni boy berib qo‘ydi.
“Nasaf” o‘tish turnirida Bahrayn chempioni hisoblangan “Al-Hidd” darvozasiga javobsiz 4 ta gol urgandi. Pley-off bosqichida esa o‘z darvozasidan 1 ta gol o‘tkazib yubordi va unga javob qaytara olmadi. “Al-Fotih”ga qarshi Saudiyada bo‘lib o‘tgan o‘yinning 45-daqiqasida Andre Monteyro jarima zarbasidan aniq foydalanib, jamoasiga g‘alaba tortiq qildi.
Portugaliyalik futbolchining goli “Al-Fotih”ni Osiyo Chempionlar ligasining guruh bosqichiga olib chiqdi. “Nasaf” esa 2017-yil hisobidan xalqaro maydondagi yurishiga yakun yasadi.
Ma’lumot uchun, “Al-Fotih” klubiga qarshi bellashuvda “Nasaf”ga asosiy darvozabon, O‘zbekiston milliy terma jamoasi a’zosi Eldor Suyunov yordam bera olmadi. Jarohati sabab Toshkentda qolgan posbon “Nasaf” ishtirokidagi bellashuvni “Sport” telekanali orqali sharhlab bordi.
Osiyo Chempionlar ligasi Pley-off 7-fevral, seshanba
“Al-Fotih” (Saudiya) — “Nasaf” 1:0
Gol: Andre Monteyro, 45 (1:0).“Nasaf”: Sanjar Quvvatov — Akmal Shorahmedov (Islom Kenjaboyev, 82), Maqsud Karimov (Shahboz Erkinov, 60), Aziz G‘aniyev (Bobur Abduxoliqov, 90), Bahrom Abdurahimov, Igor Golban, Sherzod A’zamov, Odil Hamrobekov, Farruh Sayfiyev, Doniyor Narzullayev, Dragan Cheran.
Izoh (0)