Осиё Чемпионлар лигасининг гуруҳ босқичига чиқиш илинжида Саудия Арабистонига ташриф буюрган Қаршининг «Насаф» клуби ортга қуруқ қўл билан қайтадиган бўлди. Плей-офф доирасида «Ал-Фотиҳ» клубига қарши кураш олиб борган Рўзиқул Бердиев мураббийлигидаги жамоа 0:1 ҳисобида имкониятни бой бериб қўйди.
«Насаф» ўтиш турнирида Баҳрайн чемпиони ҳисобланган «Ал-Ҳидд» дарвозасига жавобсиз 4 та гол урганди. Плей-офф босқичида эса ўз дарвозасидан 1 та гол ўтказиб юборди ва унга жавоб қайтара олмади. «Ал-Фотиҳ»га қарши Саудияда бўлиб ўтган ўйиннинг 45-дақиқасида Андре Монтейро жарима зарбасидан аниқ фойдаланиб, жамоасига ғалаба тортиқ қилди.
Португалиялик футболчининг голи «Ал-Фотиҳ»ни Осиё Чемпионлар лигасининг гуруҳ босқичига олиб чиқди. «Насаф» эса 2017 йил ҳисобидан халқаро майдондаги юришига якун ясади.
Маълумот учун, «Ал-Фотиҳ» клубига қарши беллашувда «Насаф»га асосий дарвозабон, Ўзбекистон миллий терма жамоаси аъзоси Элдор Суюнов ёрдам бера олмади. Жароҳати сабаб Тошкентда қолган посбон «Насаф» иштирокидаги беллашувни «Спорт» телеканали орқали шарҳлаб борди.
Осиё Чемпионлар лигаси Плей-офф 7 февраль, сешанба
«Ал-Фотиҳ» (Саудия) — «Насаф» 1:0
Гол: Андре Монтейро, 45 (1:0).«Насаф»: Санжар Қувватов — Акмал Шораҳмедов (Ислом Кенжабоев, 82), Мақсуд Каримов (Шаҳбоз Эркинов, 60), Азиз Ғаниев (Бобур Абдухолиқов, 90), Баҳром Абдураҳимов, Игорь Голбан, Шерзод Аъзамов, Одил Ҳамробеков, Фарруҳ Сайфиев, Дониёр Нарзуллаев, Драган Черан.
Изоҳ (0)