Ўзбекистон Президенти Шавкат Мирзиёев Хоразм вилоятига ташрифи доирасида 28 январь, шанба куни чиқиндиларни қайта ишлаш бўйича завод қурилиши билан танишди. Бу ҳақда Uzbekistan Today хабар бермоқда.
Хоразм вилоятида бунёд этиладиган чиқиндиларни қайта ишлаш заводи — Ўзбекистон бўйлаб қурилиши кутилаётган шундай йўналишдаги корхоналардан биридир.
Урганч туманидаги 15 гектар майдонни эгаллаган янги корхона учун Миллий банк 7 миллиард сўм ва 970 минг доллар сармоя киритган. Ишлаб чиқариш мажмуаси Хитойнинг Beston Group Machinery компанияси томонидан ускуналар билан таъминланади.
Корхона 2017 йил охиригача фойдаланишга топширилиши, унда ҳар йили 900 минг тоннага яқин қаттиқ маиший чиқиндилар қайта ишланиши кутилмоқда.
Корхона олти турдаги тайёр маҳсулотни ишлаб чиқаради. Жумладан, резина, автошиналар, целлофан ва пластмассалардан қозонхоналар учун ёнилғи, ёғоч қолдиқларидан эса иншоотларни иситиш учун брикетлар тайёрланади.
Салқин ичимликлардан қолган ПET-идишлардан тўқимачилик ва қурилиш соҳасида талабгир бўлган синтепон ишлаб чиқарилса, қурилиш чиқиндиларидан девор материали сифатида фойдаланса бўладиган блоклар тайёрланади.
Корхонада алоҳида бир линия макулатурани қайта ишлаб, саноат корхоналари учун қадоқлаш материали ишлаб чиқаради. Мева-сабзавот қолдиқлари ва эскирган озиқ-овқатлардан эса биогаз ва ўсимликлар учун ўғитлар тайёрланади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)