O‘zbekiston madaniyat va sport ishlari vaziri o‘rinbosari, “O‘zbeknavo” estrada birlashmasi bosh direktori Farhod Jo‘rayev 25-yanvar kuni Moskvada Rossiya madaniyat vaziri o‘rinbosari Alla Manilova bilan ishchi uchrashuv o‘tkazdi, deya xabar bermoqda O‘zbekiston Madaniyat va sport ishlari vazirligi matbuot xizmati. Rossiya Madaniyat vazirligidan ma’lum qilishlaricha, uchrashuvda O‘zbekistonning Rossiyadagi elchisi Bahrom Ashrafxonov ham qatnashgan.
Uchrashuvda O‘zbekiston hukumati va Rossiya hukumati o‘rtasida madaniy-gumanitar sohalarda 2016—2018-yillarga mo‘ljallangan hamkorlik Dasturi doirasida 2017-yilda amalga oshirilishi rejalashtirilgan quyidagi loyihalar to‘g‘risida kelishib olindi:
- Rossiyada I.V.Savitskiy nomidagi Qoraqalpog‘iston davlat san’at muzeyi ko‘rgazmasini tashkillashtirish;
- Rossiyada O‘zbekiston madaniyati kunlarini o‘tkazish;
- Rossiyalik san’atkorlarning Samarqand shahrida o‘tkazilishi rejalashtirilgan “Sharq taronalari” xalqaro musiqa festivalida ishtirok etishi;
- O‘zbekiston teatr xodimlarining Rossiyaning qator teatrlarida malaka oshirishini tashkillashtirish;
- Sankt-Peterburg shahrida o‘tkaziladigan Xalqaro teatr festivalida O‘zbek milliy akdemik drama teatri jamoasining ishtiroki.
Rossiya Madaniyat vazirligi matbuot xizmati tomonidan tarqatilgan axborotga ko‘ra, tomonlar O‘zbekiston akademik rus teatrining gastrollarini Rossiyada, Chexov nomidagi Moskva badiiy teatrining gastrollarini O‘zbekistonda uyushtirish imkoniyatlari borasida ham suhbatlashgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)