Ўзбекистон маданият ва спорт ишлари вазири ўринбосари, «Ўзбекнаво» эстрада бирлашмаси бош директори Фарҳод Жўраев 25 январь куни Москвада Россия маданият вазири ўринбосари Алла Манилова билан ишчи учрашув ўтказди, дея хабар бермоқда Ўзбекистон Маданият ва спорт ишлари вазирлиги матбуот хизмати. Россия Маданият вазирлигидан маълум қилишларича, учрашувда Ўзбекистоннинг Россиядаги элчиси Баҳром Ашрафхонов ҳам қатнашган.
Учрашувда Ўзбекистон ҳукумати ва Россия ҳукумати ўртасида маданий-гуманитар соҳаларда 2016—2018 йилларга мўлжалланган ҳамкорлик Дастури доирасида 2017 йилда амалга оширилиши режалаштирилган қуйидаги лойиҳалар тўғрисида келишиб олинди:
- Россияда И.В.Савицкий номидаги Қорақалпоғистон давлат санъат музейи кўргазмасини ташкиллаштириш;
- Россияда Ўзбекистон маданияти кунларини ўтказиш;
- Россиялик санъаткорларнинг Самарқанд шаҳрида ўтказилиши режалаштирилган «Шарқ тароналари» халқаро мусиқа фестивалида иштирок этиши;
- Ўзбекистон театр ходимларининг Россиянинг қатор театрларида малака оширишини ташкиллаштириш;
- Санкт-Петербург шаҳрида ўтказиладиган Халқаро театр фестивалида Ўзбек миллий акдемик драма театри жамоасининг иштироки.
Россия Маданият вазирлиги матбуот хизмати томонидан тарқатилган ахборотга кўра, томонлар Ўзбекистон академик рус театрининг гастролларини Россияда, Чехов номидаги Москва бадиий театрининг гастролларини Ўзбекистонда уюштириш имкониятлари борасида ҳам суҳбатлашган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)