Тошкентдаги International Hotel Tashkent меҳмонхонасида давом этаётган медиа-ҳафталик доирасида 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси лойиҳасида белгиланган мамлакатда ижтимоий соҳани янада тараққий эттириш масаласи қизғин муҳокама қилинди. Бу ҳақда ЎзА хабар берди.
Президент ташаббуси билан ишлаб чиқилган мамлакатнинг келгуси беш йиллик тараққиётига дастуриламал бўлиши мўлжалланаётган Ҳаракатлар стратегиясининг ҳаётга татбиқ этилиши давлат ва жамият ривожини янги босқичга кўтаради.
Ушбу муҳим ҳужжат лойиҳасида мамлакатда ижтимоий соҳани янада ривожлантиришнинг устувор йўналишларига алоҳида эътибор қаратилган. Унга кўра яқин келажакда одамларнинг бандлиги ва реал даромадларини босқичма-босқич ошириб бориш, аҳолини ижтимоий ҳимоя қилиш ва соғлиқни сақлаш тизимини янада такомиллаштириш, замонавий, қулай ва арзон уй-жойлар қуриш бўйича мақсадли дастурларни ҳаётга изчил татбиқ этиш, йўл-транспорт, муҳандислик-коммуникация ва ижтимоий инфратузилмани модернизация қилиш, таълим ва фан соҳасини ривожлантириш, ёшларга оид давлат сиёсатини янада бойитиш бўйича кўплаб ислоҳотларни амалга ошириш кўзда тутилмоқда.
Аҳолининг фаровон ҳаётини таъминлаш мақсадида нафақат энг кам ойлик иш ҳақи, балки бюджет ташкилотларида ҳам, хўжалик юритувчи субъектларда ҳам ўртача иш ҳақи миқдори, пенсия, стипендия ва ижтимоий нафақалар ҳажми босқичма-босқич кўпайтириб борилади.
2017 йилда мамлакат қишлоқ массивларида 15 мингта арзон, замонавий, шинам уй-жой бунёд этилади. Янги қурилаётган уй-жой массивларида давлат ресурслари ҳисобига 415,3 километр сув, 291,5 километр электр энергияси, 316,9 километр газ тармоқлари, 260,3 километр йўллар, 134 ижтимоий инфратузилма объекти барпо этилади.
2016—2020 йилларда мамлакат фармацевтика саноатини янада ривожлантириш бўйича чора-тадбирлар дастурига мувофиқ, янги фармацевтика корхоналарини ташкил этиш ва фаолият кўрсатаётган корхоналарни модернизация қилишга доир 67 инвестиция лойиҳаси амалга оширилмоқда. Бу аҳоли ва тиббиёт муассасаларида эҳтиёж юқори бўлган импорт ўрнини босадиган дори-дармон воситалари ва тиббиёт буюмлари ишлаб чиқаришни 2,5 баробар ошириш имконини беради.
– Ҳаракатлар стратегияси лойиҳасида янги иш ўринлари яратиш ҳамда аҳолининг, аввало, ўрта махсус ва олий ўқув юртлари битирувчиларининг бандлигини таъминлаш борасида қатор таклифлар илгари сурилган, – дейди Ўзбекистон Республикаси Меҳнат вазирлиги эксперти Ботир Алимуҳаммедов. – Ёшларни ўқувчилик давридаёқ касб-ҳунар ва тадбиркорликка ўргатиш, уларнинг амалиёт ўташини қатъий тартибга солишдан тортиб ўз бизнесини бошлаши учун пул-кредит билан таъминлашгача бўлган жараённи ўз ичига олувчи янги тизим ишлаб чиқилмоқда. Зеро, ёшлар ишли, ҳунарли бўлса, эзгу мақсадлар томон дадил қадам ташлайди, мамлакатимиз тараққиёти илдамлайверади.
Тадбирда соҳа мутахассислари аҳолига мажбурий ижтимоий кафолатларни таъминлаш, эҳтиёжманд қатламни ижтимоий ҳимоялашни кучайтириш, соғлиқни сақлаш соҳасини, жумладан, шошилинч тиббий ёрдам тизимини янада ислоҳ қилиш, тиббиёт муассасаларининг моддий-техник базасини мустаҳкамлаш юзасидан берилган саволларга жавоб қайтарди.
Изоҳ (0)