O‘zbekiston milliy terma jamoasining sobiq bosh murabbiyi Vadim Abramov faoliyatini “Buxoro” futbol klubida davom ettiradi. Bu haqda “Championat.asia” nashri ma’lumot berdi. “Buxoro” klubi rasmiy sayti esa shu xabar “Daryo”ga joylashtirilayotgan vaqtda hech qanday ma’lumot taqdim etmagandi.
Vadim Abramov 2015-yilgi mavsum so‘nggida Toshkentning “Lokomotiv” klubidan iste’foga chiqarilgan bo‘lib, shundan buyon bitta mavsumni ishsiz o‘tkazdi. Bu orada u Rossiya poytaxti Moskvaga tashrif buyurib, yuragini operatsiya qildirdi.
Vadim Abramov “Lokomotiv” bilan O‘zbekiston kubogi va mamlakat Superkubogini qo‘lga kiritgan bo‘lsa-da, “temiryo‘lchilar”ni Oliy liga chempionligi sari yetaklab kela olmagandi. Uning iste’fosidan keyin “Lokomotiv” Mirko Yelichich boshqaruvida ilk bor O‘zbekiston chempionatining oltin medallariga ega chiqdi.
“Buxoro” klubi 2016-yilgi mavsumni ko‘tarinki ruhda o‘tkazib, kuchli to‘rtlikdan joy olgandi. Shunga qaramay, bosh murabbiy Jamshid Saidov hamda maslahatchi Tachmurod Agamurodov rahbariyat tomonidan iste’foga chiqarildi. Bu holatga Buxoro klubi rahbariyati tomonidan izoh berilmadi.
Ma’lumot uchun, “Buxoro”ning endilikdagi sobiq murabbiylari viloyat hokimiyatida bo‘lib o‘tgan yig‘ilishdan so‘ng ishdan bo‘shatilgan.
Bunga qadar Toshkentning “Obod” klubi O‘zbekiston milliy terma jamoasining boshqa bir sobiq murabbiyi Rauf Inileyev bilan shartnoma imzolagan bo‘lsa, “Olmaliq” bosh murabbiy sifatida Viktor Kumikovni tanishtirgandi.
Izoh (0)