Ўзбекистон термасини Осиё кубоги ярим финалига олиб чиққан Вадим Абрамов «Бухоро» бош мураббийи этиб тайинланди

Ўзбекистон миллий терма жамоасининг собиқ бош мураббийи Вадим Абрамов фаолиятини «Бухоро» футбол клубида давом эттиради. Бу ҳақда «Championat.asia» нашри маълумот берди. «Бухоро» клуби расмий сайти эса шу хабар «Дарё»га жойлаштирилаётган вақтда ҳеч қандай маълумот тақдим этмаганди.

Вадим Абрамов 2015 йилги мавсум сўнггида Тошкентнинг «Локомотив» клубидан истеъфога чиқарилган бўлиб, шундан буён битта мавсумни ишсиз ўтказди. Бу орада у Россия пойтахти Москвага ташриф буюриб, юрагини операция қилдирди.

Вадим Абрамов «Локомотив» билан Ўзбекистон кубоги ва мамлакат Суперкубогини қўлга киритган бўлса-да, «темирйўлчилар»ни Олий лига чемпионлиги сари етаклаб кела олмаганди. Унинг истеъфосидан кейин «Локомотив» Мирко Йеличич бошқарувида илк бор Ўзбекистон чемпионатининг олтин медалларига эга чиқди.

«Бухоро» клуби 2016 йилги мавсумни кўтаринки руҳда ўтказиб, кучли тўртликдан жой олганди. Шунга қарамай, бош мураббий Жамшид Саидов ҳамда маслаҳатчи Тачмурод Агамуродов раҳбарият томонидан истеъфога чиқарилди. Бу ҳолатга Бухоро клуби раҳбарияти томонидан изоҳ берилмади.

Маълумот учун, «Бухоро»нинг эндиликдаги собиқ мураббийлари вилоят ҳокимиятида бўлиб ўтган йиғилишдан сўнг ишдан бўшатилган.

Бунга қадар Тошкентнинг «Обод» клуби Ўзбекистон миллий терма жамоасининг бошқа бир собиқ мураббийи Рауф Инилеев билан шартнома имзолаган бўлса, «Олмалиқ» бош мураббий сифатида Виктор Кумиковни таништирганди.