26-yanvar butun dunyoda Xalqaro bojxonachilar kuni sifatida nishonlanadi. An’anaga ko‘ra, kasb bayramida arafasida O‘zbekiston bojxona xizmatining o‘tgan yildagi faoliyati yakunlari sarhisob qilinadi. Bu haqda “Daryo”ga qo‘mita axborot xizmati ma’lum qildi.
2016-yil bojxona sohasida nihoyatda samarali yil bo‘ldi. Xususan, bojxona ishining yagona qonunchilik bazasini xalqaro standartlarga mos ravishda shakllantirish, bojxona ma’murchiligining barcha bosqich va darajalarida huquqiy norma va yondashuvlarni bir xilda qo‘llanilishini ta’minlash, tashqi iqtisodiy faoliyatni tartibga solish maqsadida yangi tahrirdagi Bojxona kodeksi 22-apreldan boshlab kuchga kirdi.
O‘zbekiston Respublikasi Prezidentining “Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risida” Farmoni qabul qilinishi tashqi iqtisodiy faoliyat ishtirokchilariga bojxona sohasida ham bir qator qulayliklar va yengilliklarni taqdim qildi. Jumladan, tadbirkorlik subyektlari tomonidan tovarlarning eksporti bo‘yicha tuzilgan eksport shartnomalari bojxona organlarida hisobga qo‘yish tartibi 2017-yilning 1-yanvaridan bekor qilindi.
Farmon bilan tasdiqlangan Dasturga muvofiq, tovarlarni eksport bojxona rejimiga rasmiylashtirishda bojxona rasmiylashtiruvini belgilangan joylardan boshqa joylarda amalga oshirganlik uchun eng kam oylik ish haqining 10 foizi miqdorida undiriladigan bojxona yig‘imi ikki baravarga kamaytirildi.
Mazkur Dastur bilan bojxona organlariga yuklatilgan tovarning kelib chiqish sertifikati, veterinariya, fitosanitariya, ekologik, sanitariya-epidemiologik xulosalarni rasmiylashtirishda tadbirkorlik subyektlariga ruxsat beruvchi tartib-taomillardan o‘tish jarayonini interaktiv kuzatish imkonini beradigan “Yagona darcha” idoralararo axborot tizimini to‘liq joriy qilish ishlari esa yakuniy bosqichga yetib keldi va yaqin kunlarda tizimning taqdimoti bo‘lib o‘tadi.
Tashqi iqtisodiy faoliyat ishtirokchilarini qo‘llab quvvatlash, mahalliy ishlab chiqarishni yanada kengaytirish maqsadida tadbirkorlarga 2016-yilda O‘zbekiston Respublikasining amaldagi qonunchiligiga muvofiq Davlat bojxona qo‘mitasi tomonidan bojxona to‘lovlari bo‘yicha 13,3 trillion so‘m miqdorida imtiyozlar berildi.
Taqdim etilgan imtiyozlar asosan mamlakatda ichki ishlab chiqarishni rivojlantirish hamda investitsiya loyihalarini amalga oshirish maqsadida, mahalliylashtirish dasturi doirasida, shuningdek, mahsulot ishlab chiqarishni modernizatsiyalash, qayta ta’mirlash, texnik va texnologik jihatdan yangilashga qaratilgan dasturlar ijrosi bo‘yicha chetdan olib kelingan texnologik asbob-uskunalar, butlovchi buyumlar, xom-ashyolar va materiallarga qo‘llanilgan.
2016-yilda bojxona boshqarmalari, kompleks va postlarida bunyodkorlik ishlari amalga oshirildi. Jumladan, Qoraqalpog‘iston Respublikasining “Xo‘jayli” o‘tkazish punktlarini kengaytirildi va qayta qurildi, Samarqand viloyatining 6 qavatli yangi ma’muriy binosi bunyod etildi, “G‘ishtko‘prik” bojxona kompleksining ma’muriy binosi ta’mirlandi hamda mobil skaner qurilmasi va avtotarozi uchun maydon barpo etildi.
O‘tgan yili bojxona xodimlarining ijtimoiy-maishiy ahvolini yanada yaxshilashga qaratilgan qator loyihalar amalga oshirildi. Bir guruh bojxona xodimlari va ularning oila a’zolariga Sergeli tumanida qurib bitkazilgan 40 xonadondan iborat zamonaviy, barcha shart-sharoit va qulayliklarga ega 2 ta yangi xizmat uylari kalitlari topshirildi.
2016-yilda bojxonachilar tomonidan huquqni muhofaza qiluvchi boshqa idoralar bilan hamkorlikda 19 mingdan ortiq qonunbuzarlik holatlari aniqlanib, qiymati 68 milliard so‘mlik tovar-moddiy boyliklar daliliy ashyo sifatida ushlab qolindi.
Bojxonachilar mehnati hamisha e’zozlanib, munosib e’tirof qilib kelinmoqda. O‘tgan yili 7 nafar, joriy yilda esa 2 nafar bojxona xodimi davlatning yuksak mukofotlariga sazovor bo‘ldi. Tizimda o‘rnak ko‘rsatib xizmat qilib kelayotgan 200 nafardan ortiq xodim esa “O‘zbekiston Respublikasi Qurolli Kuchlariga 25 yil” esdalik nishonlari bilan mukofotlandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)