26 январь бутун дунёда Халқаро божхоначилар куни сифатида нишонланади. Анъанага кўра, касб байрамида арафасида Ўзбекистон божхона хизматининг ўтган йилдаги фаолияти якунлари сарҳисоб қилинади. Бу ҳақда «Дарё»га қўмита ахборот хизмати маълум қилди.
2016 йил божхона соҳасида ниҳоятда самарали йил бўлди. Хусусан, божхона ишининг ягона қонунчилик базасини халқаро стандартларга мос равишда шакллантириш, божхона маъмурчилигининг барча босқич ва даражаларида ҳуқуқий норма ва ёндашувларни бир хилда қўлланилишини таъминлаш, ташқи иқтисодий фаолиятни тартибга солиш мақсадида янги таҳрирдаги Божхона кодекси 22 апрелдан бошлаб кучга кирди.
Ўзбекистон Республикаси Президентининг «Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида» Фармони қабул қилиниши ташқи иқтисодий фаолият иштирокчиларига божхона соҳасида ҳам бир қатор қулайликлар ва енгилликларни тақдим қилди. Жумладан, тадбиркорлик субъектлари томонидан товарларнинг экспорти бўйича тузилган экспорт шартномалари божхона органларида ҳисобга қўйиш тартиби 2017 йилнинг 1 январидан бекор қилинди.
Фармон билан тасдиқланган Дастурга мувофиқ, товарларни экспорт божхона режимига расмийлаштиришда божхона расмийлаштирувини белгиланган жойлардан бошқа жойларда амалга оширганлик учун энг кам ойлик иш ҳақининг 10 фоизи миқдорида ундириладиган божхона йиғими икки бараварга камайтирилди.
Мазкур Дастур билан божхона органларига юклатилган товарнинг келиб чиқиш сертификати, ветеринария, фитосанитария, экологик, санитария-эпидемиологик хулосаларни расмийлаштиришда тадбиркорлик субъектларига рухсат берувчи тартиб-таомиллардан ўтиш жараёнини интерактив кузатиш имконини берадиган «Ягона дарча» идоралараро ахборот тизимини тўлиқ жорий қилиш ишлари эса якуний босқичга етиб келди ва яқин кунларда тизимнинг тақдимоти бўлиб ўтади.
Ташқи иқтисодий фаолият иштирокчиларини қўллаб қувватлаш, маҳаллий ишлаб чиқаришни янада кенгайтириш мақсадида тадбиркорларга 2016 йилда Ўзбекистон Республикасининг амалдаги қонунчилигига мувофиқ Давлат божхона қўмитаси томонидан божхона тўловлари бўйича 13,3 триллион сўм миқдорида имтиёзлар берилди.
Тақдим этилган имтиёзлар асосан мамлакатда ички ишлаб чиқаришни ривожлантириш ҳамда инвестиция лойиҳаларини амалга ошириш мақсадида, маҳаллийлаштириш дастури доирасида, шунингдек, маҳсулот ишлаб чиқаришни модернизациялаш, қайта таъмирлаш, техник ва технологик жиҳатдан янгилашга қаратилган дастурлар ижроси бўйича четдан олиб келинган технологик асбоб-ускуналар, бутловчи буюмлар, хом-ашёлар ва материалларга қўлланилган.
2016 йилда божхона бошқармалари, комплекс ва постларида бунёдкорлик ишлари амалга оширилди. Жумладан, Қорақалпоғистон Республикасининг «Хўжайли» ўтказиш пунктларини кенгайтирилди ва қайта қурилди, Самарқанд вилоятининг 6 қаватли янги маъмурий биноси бунёд этилди, «Ғишткўприк» божхона комплексининг маъмурий биноси таъмирланди ҳамда мобил сканер қурилмаси ва автотарози учун майдон барпо этилди.
Ўтган йили божхона ходимларининг ижтимоий-маиший аҳволини янада яхшилашга қаратилган қатор лойиҳалар амалга оширилди. Бир гуруҳ божхона ходимлари ва уларнинг оила аъзоларига Сергели туманида қуриб битказилган 40 хонадондан иборат замонавий, барча шарт-шароит ва қулайликларга эга 2 та янги хизмат уйлари калитлари топширилди.
2016 йилда божхоначилар томонидан ҳуқуқни муҳофаза қилувчи бошқа идоралар билан ҳамкорликда 19 мингдан ортиқ қонунбузарлик ҳолатлари аниқланиб, қиймати 68 миллиард сўмлик товар-моддий бойликлар далилий ашё сифатида ушлаб қолинди.
Божхоначилар меҳнати ҳамиша эъзозланиб, муносиб эътироф қилиб келинмоқда. Ўтган йили 7 нафар, жорий йилда эса 2 нафар божхона ходими давлатнинг юксак мукофотларига сазовор бўлди. Тизимда ўрнак кўрсатиб хизмат қилиб келаётган 200 нафардан ортиқ ходим эса «Ўзбекистон Республикаси Қуролли Кучларига 25 йил» эсдалик нишонлари билан мукофотланди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)