Tramp o‘z inauguratsiyasi sanasini Milliy vatanparvarlik kuni deb e’lon qildi

AQSh prezidenti Donald Tramp o‘z inauguratsiyasi bo‘lib o‘tgan 20-yanvarni Milliy vatanparvarlik kuni deb e’lon qildi. Bu haqda “RBK” xabar bermoqda.

Tramp bu haqdagi farmonni prezidentlik lavozimiga kirishganidan keyin, vakolatining dastlabki kunlarida imzolagan.

“Men, AQSh prezidenti Donald Tramp, Qo‘shma Shtatlar Konstitutsiyasi va qonunlari bilan menga taqdim etilgan hokimiyatdan foydalanib, mazkur farmon bilan 2017-yilning 20-yanvarini Milliy vatanparvarlik kuni deb e’lon qilaman”, — deyiladi hujjatda.

Avvalroq Tramp inauguratsiyasi yakuniga yetishi bilan, oila a’zolari va Respublikachilar partiyasi yetakchilari guvohligida dastlabki uchta farmonni imzolagani ma’lum bo‘lgan edi. Bular — general Jeyms Metissni mudofaa vaziri etib tayinlash, Senatga ikkita nomzod ko‘rsatish va Milliy vatanparvarlik kuni haqidagi farmonlardir.

Imzolangan hujjatlar inauguratsiyadan keyingi dastlabki ish kuni — 23-yanvarda federal hukumatga topshirilgan.

Inauguratsiyadan keyingi dastlabki kunlarda Donald Tramp sog‘liqni saqlash islohoti to‘g‘risida va AQShning Tinch okeani hamkorligi — Osiyo va Tinch okeani mintaqasidagi 12 mamlakat o‘rtasidagi savdo bitimidan chiqishi haqidagi farmonlarni ham imzoladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.