Qozog‘iston poytaxti Ostonada Suriyadagi vaziyatni tartibga solish bo‘yicha rasmiy Damashq va Suriya muxolifati vakillari ishtirokidagi uchrashuv yakunlandi, deya xabar bermoqda “Interfaks”.
Suriya masalasi bo‘yicha kafil mamlakatlar — Rossiya, Eron va Turkiya Suriyada o‘t ochishni to‘xtatish rejimiga rioya qilinishi ustidan nazorat mexanizmini yaratishga kelishib oldi. Kafil mamlakatlar o‘zlari e’lon qilgan bayonotda IShID va al-Nusraga qarshi kurashishda davom etish niyatlarini tasdiqladi.
Eron, Turkiya va Rossiya Suriya inqirozini tartibga solish uchun BMT ko‘magida Ostona platformasida hamkorlik qilishga kelishib oldi. Ushbu mamlakatlar, shuningdek, Suriyaning yaxlitligi va suverenitetini tasdiqladi.
Suriya hukumati delegatsiyasi rahbari Bashar Jaafariy so‘zlariga ko‘ra, Suriya bo‘yicha Ostonadagi muzokaralar ishtirokchilarining maqsadi yarashuvni mustahkamlash va inqirozni siyosiy yo‘l bilan hal etishdan iborat bo‘lgan, va ular natijaga erishish uchun barcha kuchini ishga solgan.
O‘z navbatida muxolifat BMTga o‘t ochishni to‘xtatish mexanizmining o‘z versiyasini taqdim etdi, u keyinroq Suriya hukumatiga topshirilishi kerak. Muxolifat mamlakat prezidenti Bashar Asad rejimining javobini bir haftacha kutishga tayyorligini ma’lum qildi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)